Keterubah dikemendar tang udah nya ketegal sakit, nadai di rumah peminta nya ditulak
KUCHING: Dua iku indai tunggal di Melugu, Sri Aman udah lama ngarap bulih rumah ari Projek Perumahan Rakyat Termiskin (PPRT).
Salia Tembak ari Melugu Skim enggau Yak Chagat ari Melugu Kuari bela madahka peminta seduai udah dikemendar tang enda nemu kebuah ditulak.
Ku cherita ari Opis Pengintu Pengelantang Pendiau (JKM), PPRT ditulak laban lebuh maya pemesai ari JKM meresa rumah, seduai bela enda dia.
Ngasaika peminta seduai patut diperundingka JKM baru, suah udah niki opis nya tang meruan enda dikeibuh.
Chairman DAP Sri Aman Leon Jimat Donald, lebuh mendingka sebana seduai berasai sinu meda ga-ya rumah ke endur seduai diau.
Kededua seduai tu orang ngereja pengawa bumai lalu asil ulih ninting hari endang enda chukup diungkup ke belanja bukai kelimpah ari pakai diri.
Nitih penerang seduai, keterubah pemesai ari JKM udah meresa rumah nya lalu ngemendarka seduai bulih PPRT tang lebuh meresa kedua kali dia seduai bela nadai di rumah; Yak berubat di sepital lalu Salia ngabas menyadi iya sakit raya.
Aku deka bebendar mai sebana seduai tu ngagai JKM Sri Aman seraya deka nulis surat ngagai Men-teri Pengintu Pengelantang Pendiau, Pekara Orang Indu enggau Pemansang Ruang Bilik, Datuk Fatimah Abdullah.
Nengah berekat ari Tuhan, arapka peminta nya dikemendar,” ku Leon ke mega sapit chairman DAP Sarawak.