Dikarang Jacqueline R. David //
KUCHING: Gaya landskap di menua ASEAN maya taun 2015 deka nyadi seiti sitak menua ke ngembuan makit tebuka ungkup menua ASEAN aja.
ASEAN bisi sepuluh buah menua dalam gempung nya, Malaysia, Indonesia, Brunei, Thailand, Myanmar, Singapura, Filipin, Korea Selatan, Vietnam, Kemboja enggau Laos.
Menteri Pengawa Berumah Datuk Amar Abang Johari Tun Openg madah, lebuh ASEAN nyadi menua ke ngembuan makit tebuka ila, ASEAN deka nyadi seiti menua ke dikumbai ‘common area’.
“Enti deka bedagang nadai sekat, ari sukut pelajar pan deka dibuka ngagai menua ASEAN. Enti anak-anak kita deka belajar ba Indonesia pan tau, lalu enti nembiak Indonesia deka belajar di Malaysia pan sama tau sekalika deka ngelakuka barang ari menua ASEAN empu.
“Ekonomi kitai deka nyadi seiti ekonomi alai barang menua ASEAN tau bedagang enggau pangan diri,” ku Abang Johari.
Iya madah munyi nya lebuh bejaku ba atur pengawa Meri Gelar Nembiak Sekula ke pengabis nyulut, nyuaka rumah ngagai KGBS (Serakup Pengajar Bumiputera Sarawak) enggau ‘Ramah Tamah Aidilfitri KGBS’ ti diatur ulih KGBS di Hotel Penview ditu, kemari.
Nangkan ke nya. Iya madah lebuh pemesai makit tu dibuka, rayat ASEAN (ke bisi dalam 600 juta) ke pintar muntang bulih pengawa dalam pampang ekonomi rama sereta politik.
“Diatu udah bulan Ogos, tinggal empat bulan agi. Dalam kandang enam bulan pekara tu deka nyadi, reti nya kitai bisi seiti palan ke manah.
“Nengah gaya bansa nya, semina sida ke bisi pelajar aja ke deka nyadi sebagi ari pengubah landskap tu.
“Kitai enda tau enda nemu ngena teknologi kemaya hari tu kena kitai ngemansangka komuniti kitai, lalu sehari tu, pekara tu enda tau enda dikemerat, iya nya ngajar bala anak bansa kitai,” ku iya.
Abang Johari ngenyemaka chunto kimpin mensia mayuh kemaya hari tu ke bekait enggau penusah ke nuntung Gaza (di Palestin), ngambika orang Palestin ulih bebalas lalu bisi mega rayat nyadang boikot asil tauka produk ti digaga ulih orang Jews (Israel).
“Tang Facebook (arong media rama) sapa ke ngaga? Orang ke bempu Facebook nya benama Mark Zukerberg, iya seiku orang Jews lalu kita entara mensia mayuh di dunya tu ke ngena teknologi Jews.
“Boikot salah, enda boikot pan salah laban bansa sida (Jews) ke bisi teknologi bansa tu. Nya alai, ari lalau nya, nembiak enda tau enda nemu pasal teknologi,” ku iya lalu nambah orang Jews tu mih ke pengabis mayuh landik dalam pekara teknologi.
Besemaka pengelandik bansa nya, iya madah anak-anak kitai nyadi reta ke pengabis berega lalu sida iya patut diberi pelajar laban jemah ila, enti sida iya nyadi orang ke bepengelandik, bala nembiak tu ke deka nyadi orang ke ngemansangka bansa enggau menua.
“Kitai enda tau enda ngangkatka bala anak kitai (Bumiputera) ngambika sida iya sama maju baka orang bukai dalam era global baka kemaya hari tu.
“Laban enti kitai nadai pelajar ke tegut, kitai ukai agi nyadi reta ngagai menua enggau bansa tang deka nyadi penanggul.
“Gaya semekih orang kelia enggau diatu enda sebaka. Suba semekih kami luas tang diatu nyau majak mit. Nya alai enti karung nya majak mit, semekih pan enda besai lalu semina sida ke nyadi champian lalu bisi pelajar tinggi aja ke ulih ngerebut peluang nya,” ku iya.
Nya alai ku iya, ngembuan pelajar nyadi senjata, sereta ulih besemekih enggau orang bukai lalu senjata nya ke ulih ngelatih nembiak regas berunding, laban enti enda, kitai semina nitihka orang aja.
“Semina orang ke regas berunding ulih nyadi ketuai laban ketuai tu, singkang iya dua iti singkang ke mua ari orang bukai.
Kelimpah ari nya, kitai pan patut negapka palan ekonomi kitai, lalu kena ngadu iya bansa nya, kitai enda tau enda ngena teknologi moden sereta patih enggau gaya rampa ke berubah.
Ku iya, nyangka nembiak nanya nama sangkut paut sida iya enggau gaya ekonomi kemaya hari tu?
“Kitai enda agi ulih ngena sistem lama tang belajar ngena sistem baru. Nya alai, ambi peluang tu belajar enggau bebendar ngambika jemah ila, peluang besemekih enggau orang bukai deka nyadi siti peluang ke pengabis manah dalam era global diatu,” ku iya.
Ba atur pengawa nya kemari, Abang Johari ngarika Opis Pengawa Berumah (HDC) meri sebuah rumah bangelo di Desa Guru ke berega lebih kurang RM60,000 ngagai KGBS alai sida iya ngaga aktiviti gerempung.
Kelimpah ari nya mega, KGBS mega bisi meri insentif ngagai bala anak kaban KGBS ke udah mujur dalam peresa perintah.
Sama bisi ngulu pengawa nya, presiden KGBS, Ahmad Mahlie enggau sapit presiden, Mohd Mortadza Matrang.