MIRI: Kaban kunsil nengeri (ADUN) sitak Lambir Ripin Lamat minta saup polis ngetuka pengawa nyabung enggau judi belalai, enda jauh ari Kampung Lusut, Taman Tunku sereta di Tukau, Lambir laban nya tau bendar ngeruga ulah peranak menua di baruh konstituensi iya.
Iya mega madah udah suah nerima sebana ari peranak menua nya lalu madahka tempat nya nyadi palan endur nyabung enggau judi ninting hari. Sida irau enggaika penyadi kes timbak di Kampung Lusut apin lama ke udah nyadi baru.
“Mayuh udah sebana pasal pengawa nyabung sereta judi belalai udah diterima aku lalu piak ti bekuasa nadai ngambi atur ti patut kena ngetuka ulah ke nyau betaun udah dikereja raban orang ti nadai beradat nya,” ku Ripin nyerita ngagai The Borneo Post, maya ngabang Hari Raya di Kampung Sungai Dalam, Lambir, kemari.
Nitih penerang ari Ripin, iya enggai meda kes timbak baka ke udah nyadi di Lambir empai lama ke udah ngulang baru lalu ari nya iya minta piak ti bekuasa ngeneritka atur.
Peranak menua ti besemak mega sebana palan sabung nya mega endur orang bejudi enggau nadai pemendar.
Ripin ke mega Sekretari Politik Kepala Menteri madah, kitai enggai meda palan sabung enggau judi nya dikemendar endur ulah ke enda beradat laban nya tau bendar ngeruga pengelikun mensia mayuh ke ngelingi nya.
“Pengawa nyabung enggau judi tau bendar meri empas negatif ngagai peranak menua dia sereta sida ti bekelingi,” tandu iya.