BINTANGOR: Peranak Rumah Peter Kilas, Nanga Selidap ditu nyentuk ke sehari tu mengkang nganti penembu jalai ngelawa rumah panjai sida.
Tuai Rumah Peter Kilas maya berandau enggau pengarang berita kemari madah, naka ke diatu projek jalai sida semina udah tembu 1.6 Kilomter aja ari 3.1 kilometer.
Ku iya, projek jalai nya berengkah digaga kenyau ari taun 2013 suba.
“Pekara ke nyadi diatu iya nya peranak rumah panjai aku suah bendar betanya ngagai aku kemaya jalai nya tembu.
“Semina 1.5 kilometer aja agi jalai tu deka tembu endar digaga,” pia ku iya madah.
Peter madah, ujung taun seiti nyin suba iya bisi dikangau enggau baum berandau senentang projek jalai nya.
Ku iya ba randau nya, belanja ke dikena ngaga jalai ke udah tembu digaga naka 23 Disember 2013 semina ungkup 1.6 kilometer aja.
“Diatu kami serumah agi nganti ungkup belanja baru dikena nembuka jalai nya.
“Tang kami enda nemu nyentuk kemaya kami nganti,” ku iya madahka baru.
Ku Peter, nyema empai bisi belanja dikena nembuka projek tang sida serumah minta jalai nya dianchauka batu dulu seraya ke disemin tauka dibelankin.
“Enti udah dianchauka batu taja empai tembu silik pan jalai tu udsah ulih ditengah,” ku iya madah baru.
Iya madah, penembu jalai nya ila ulih ngemuntangka sida serumah berundang gawa ngagai pasar Bintangor tauka ba menua bukai.
Bisi mega sida serumah nyuwa rumah ba pasar Bintangor laban ke enggai berundang ngena perau ari rumah panjai.
“Enti udah tembu ila, kami semina begunaka 10 nyentuk ke 15 minit aja ngelawa pasar Bintangor.
“Kami ngarapka penanggul tu ulih diputar enggau lengkas.
“Penembu jalai tu mega ukai semina ngurangka agi belanja nyuwa rumah ba pasar tang pechaya ulih nyadi seiti ari kebuah dikena nyungkakka agi penatai pemisi kami ditu,” pia ku iya seraya meri besai terima kasih ngagai perintah laban udah ngemendarka projek jalai ngelawa rumah panjai sida.