KAPIT: Seiku orang dagang ke mega orang politik, Dato’ Kristoffer Nyuak Bajok dikearapka BN ulih ngerampas sitak Pelagus ari penyakal bepelasarka timbal ari rayat ba tikas nembiak redak.
Iya bejaku munyi tu pengudah nemuai ngagai tiga buah rumah panjai iya nya Rumah Puso, Sungai Encheremin, Rumah Sekudan, Ulu Pelagus enggau Rumah Sadang, Ulu Metah empai lama ke udah.
Naka ke diatu nyauka serap kandang menua di sitak Pelagus udah dilawa iya taja pan pengawa Bepilih Kunsil Nengeri agi lama diatur.
Ku Nyuak, semampai berasai lantang enti kitai nemu pasal sitak nya laban enti datai ba maya pengawa bepilih ila, kami (BN) udah ckukup nyendiaka diri. “ Kenyau ari taun seiti nyin tadi, aku udah chakah endar mindah ba serata sitak tu ke alali penatai aku diterima enggau manah.
“Kini aja aku bejalai, semampai bisi didinga sukung ari pengundi di Pelagus ti madahka diri nyukung perintah BN. Sida mega dekaka chalun ti ulih dikearap menang ari BN tngerampas sitak nya ari penyakal maya PRN tu ila.” ku iya.
Ba rayat ditu, Nyuak dikelala seiku orang ti ngemaruhka diri, mudah enggau berandau sereta grah jari nyuaka bantu ke alai iya dikerinduka mensia mayuh di sitak tu.
Lebuh ke nemuai ngagai ketetiga buah rumah panjai nya (Rh sekudan, Rh Puso and Rh Sadang) Nyuak enggau raban iya nepan kerita 4WD nengah jalai kayu batang ngelama empat jam pejalai. Iya disempulang bini iya, Datin Serani Magai, ketuai raban bansa baka, Pengulu Esit Nalo (Ketuai bansa Beketan), Pengulu Uga Esop, Pengulu Geruna Mawan enggau sekeda bala tuai rumah ari sitak Pelagus.
Nangkanka nya, kena 21 Julai 2014, Nyuak udah dikangauka Tr. Jandok ari Ulu Sungai Yong bejadika rumah panjai baru sida.
Nangkanka nya, Nyuak mega bisi nemuai ngagai sekeda rumah panjai bukai baka Rumah Ama, Nanga Metah, Batang Rejang di sitak Pelagus, sebuah ari rumah panjai ba ulu entigis semak enggau garis entara menua Kapit enggau Belaga, ke alai lebuh ke dtai din iya disambut urung 300 iku peranak menua nya nyengkaum 34 iku Tuai Rumah, ketuai raban bansa enggau sekeda kaban ari parti komponen BN.