MIRI: Parti Rakyat Bersatu (UPP) deka belajar ari penyilap Parti Sa’ati Rakyat Sarawak (SUPP) nengah chara ngemeratka bala nembiak ngiring parti nya.
Penengkebang UPP Dato Sri Wong Soon Koh madah, parti ngembuan tuju ke tampak sereta deka meri peluang ngagai nembiak rebak baru ngiring parti lalu ukai nejuka parti dikerengkun orang tuai baka ke nyadi dalam SUPP.
“UPP deka diiring raban nembiak rebak baru sereta enda dikerengkun orang lama.
“Aku sinu meda pekara ke ninggang SUPP, sida dikerengkun orang lama.
“Ukai ba tikas ke pemadu tinggi aja tang mega ba tikas pampang ke dikuasa raban veteran,” ku iya.
Bejaku ba aum media pengudah merarau ditu ensanus Wong madah, taja pan UPP bisi kaban veteran tang sida enda ngiring parti nya.
Berebak enggau nya, penumbuh UPP deka dipenyadika kena 16 Ogos tu ila di Kuching.
Ku Wong nandu, nya singkang ke baru sereta ngarapka sukung ari rayat ba kandang mengeri lebih agi raban bansa China.
“Tu parti pupu raban bansa ti ngemeratka rayat ba kandang mengeri baka ke digaga SUPP.
“Parti tu deka ngeringka pekara ti sama rata, sama bela ngemeratka hak ungkup rayat Sarawak,” ku iya.
Ku iya nandu, UPP deka bekerejasama enggau Kepala Menteri sereta Menteri Besai laban ti talukka Barisan Nasional (BN) ngambi pulaika pemaik ngagai semua rayat di nengeri tu.
“ Aku enggai nyerita kelalu mayuh penerang pasal UPP, anti meh pengudah dipenyadi kena 16 Ogos tu ila,” ku iya.
Dulu ari nya, Wong nyuaka chek ngagai empat buah serakup enggau gerempung baka Kelab Kaligrafi China enggau Seni Budaya Limbang sereta Gerempung serakup China Limbang ke sama bela nerima RM10,000 enggau Gerempung Serakup China Miri enggau sekeda Serakup Sekula Primari China Bagi Menua Miri Limbang ke sama bela nerima RM20,000.