Dikarang Churchill Edward //
Naka ke diatu, Taib apin tepantup ati meda tikas pemansang ke dijapai menua Sarawak
KUCHING: Tuai Pemegai Menua (TYT) Tun Pehin Sri Abdul Taib Mahmud pechaya atur pemansang nengeri tu ulih dikerembai besai agi.
Iya ke kala nyadi kepala Menteri Sarawak pengelama 30 taun madah: “Aku bedau tepantup ati enggau tikas pemujur ke ditempa diatu lalu nya nagih kitai ngemajakka pengangkun ngemansang nengeri tu taja pan aku udah pinchin, tang kitai bisi ketuai baru. Aku pechaya, penganti aku Tan Sri Datuk Amar Adenan Satem ke nyadi Kepala Menteri kelima ulih ngiring pemansang nengeri tu ngagai tikas ke tinggi agi”.
Iya pechaya Adenan ngembuan integriti, adil sereta ngembuan pengeran mantu rayat. Iya mayuh peneleba pengudah meri servis dalam kabinet nengeri pengelama 30 taun.
Taib madah Adenan ngembuan peneleba ti tau mantu iya ngiring Sarawak nyapai pengelikun enggau pengelantang ke meruan.
“Aku deka bekenaka awak tu meri jaku puji ngagai semua peranak nengeri tu ti udah meri sukung rambau aku ke nyadi Kepala Menteri pengelama 30 taun,” ku iya ba jaku pesan Hari Raya Aidilfitri nyadi Tuai Pemegai Menua (TYT).
Ku iya, sukung nya majak nambah tiap kali pengawa bepilih sekalika bepilih nengeri tauka bepilih parlimen lalu nya mandangka penyerakup sereta penegap sukung rayat ngagai perintah dibaruh pegai iya.
“Ketegal nya, parti ke bekuasa ulih bejalaika atur merintah enggau manah lalu ngembuan pengelandik ngemutar sebarang pemar ungkup pemaik rayat enggau nengeri.
“Aku udah meda pekara ti udah ditempa Sarawak pengelama 33 taun ke udah. Pemujur kitai ba pekara ekonomi dipandangka ba penatai per kapita lalu udah niki 10 kali berengkah ari RM4,000 ba 1981 nyentuk RM40,000 diatu.”
“Ketegal nya, kitai meri puji ngagai Allah SWT pengudah mujur ngangkatka setindit pengidup rayat sereta majak likun sereta lantang,’ku Taib.
Diatu 90 peratus kampung tauka rumah panjai ba menua pesisir udah ulih ngasai pemaik ari pemansang infrastruktur.
Perintah Nengeri melanja lebih RM1 billion ninting taun dikena ngaga jalai di menua pesisir sereta perengka guna bukai nyengkaum bekal lekterik enggai ai.
“Taja pia, kitai enda ulih nyendia perengka guna nya ngagai sekeda kampung tradisional enggau rumah panjai ba serata nengeri ketegal sida idup ba raban ke mit ba endur ke besai. Timpuh ke panjai diguna dikena nyendiaka semua perengka guna tu di menua pesisir taja pan perintah bisi belanja ungkup pengawa nya,’ku iya.
Aku pechaya Sarawak deka nempa pemujur ke besai agi ari nya sereta ulih nyendiaka awak kereja begaji besai ngagai peranak nengeri tu.
Aku pechaya YAB Tan Sri Datuk Amar Adenan deka nampung pengawa ke udah dipun ba palan SCORE, tandu iya.