Penanggul suntuk ai tu udah nyadi ba kandang menua tu kenyau ari maya Gawai tu tadi
KUCHING: Parti Keadilan Rakyat (PKR) udah mantah penerang ti dipansutka Sapit Kepala Menteri apin lama ke udah ti madah menua Betong nadai betapi enggau penanggul ai, ke alai pekara nya dikumbai penyakal jauh ari utai ke amat nyadi dia.
Ketuai PKR Pampang Betong Vernon Kedit madahka sida udah meresa pekara nya ba Opis Kereja Raya (JKR), ke alai mayuh sebana ti didinga ari sekeda genturung pendiau enggau rumah panjai ti madahka paip ai sida lama udah rangkai nyengkaum ari sekeda ke ba puak pasar Betong tnya empu.
Ku iya kandang menua ke balat endar suntuk ai iya nya Genturung Pendiau Melayu Ulu, Genturung Pendiau Melayu Tengah, Genturung Pendiau Melayu Ili enggau Genturung Pendiau Masjid Betong. Rumah panjai Iban ke dalam kandang 10 km radius ari puak pasar Betong baka Saka, Ngelutong, Tansang, Tembawai Bawai Lubok, Remabong, Penurin enggau Pematoh.
“Nitihka ripot berita ke ditabur pukul 4 lemai kena Hari Empat tu tadi, Sapit Kepala Menteri Datuk Patinggi Tan Sri Alfred Jabu Numpang diripot madahka menua Betong nadai betapi enggau penanggul suntuk ai.
“Hari Raya deka diintu enda lama agi tang Jabu ke mega Kaban Kunsil Nengeri Layar madahka menua Betong enda suntuk ai.Nama kebuah iya ngemulaka rayat?” pia ku madah ba aum enggau pengarang berita ke diatur ba opis Pampang PKR Stampin ditu ensanus.
Ku Vernon baru, penanggul suntuk ai tu udah nyadi kenyau ari maya Gawai tu tadi. Mayuh kandang menua betapi enggau penanggul suntuk ai beresi. Seiti ari kebuah penanggul nya nyadi ku uya, paip lama ke mesai 6 inchi nya enda tetapika penguat kesuh ai.
Kandang menua bukai ke suah endar betapi enggau penanggul tu nyengkaum rumah panjai Entanak enggau Lempaong ke enda jauh ari pasar baru Betong enggau Kompleks opis perintah. Iya mega betanya nama kebuah Jabu ke mega Sapit Kepala Menteri enda ulih nentuka penyampau ai ke chukup dikena ba kandang pasar Betong nya maya abad ke 21 tu.
“Aku enda nyalah Opis Kereja Raya (JKR) sentang pekara tu tang Jabu ti enda madah pekara ke amat nyadi. Opis nya udah naka ulih bejalaika pengawa sida enggau manah mantu rayat. Aku mega meri terima kasih ngagai JKR laban ke udah nyadung ai ngagai rayat,” pia ku iya.
Vernon mega minta Jabu nyaga sitak iya enggau manah.