KUCHING: Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah temegah ati sereta muji peranak nengeri dalam taun tu ti mayuh bejalaika tanggungpengawa rama koperat (CSR).
Iya madahka tanggungpengawa rama korperat nya patut chakah agi dipejalai di nengeri tu ngambika mayuh agi peranak Sarawak ke begunaka bantu teulihka penguntung ari nya.
“Ari perati aku empu, taun tu mayuh CSR udah dipejalaika gerempung ukai dikuasa perintah (NGO), gerempung korperat, orang seseiku enggau orang mayuh di nengeri tu. Ba aku tu pekara ti chukup manah ke Sarawak.
“Tanggungpengawa rama korperat (CSR) tu ukai dipejalaika sesebengkah raban gerempung aja tang mayuh, lalu ari pemayuh ke bejalaika CSR tu dia deka mayuh agi orang ke patut teulihka penguntung,” ku iya lebuh dikerandau pengarang berita.
Dulu ari nya Fatimah nyuaka 1,500 iti bungkus bubur lambuk ti diatur begulai enggau Serakup Jurufoto Media Sarawak (SPPA), Biro Indu, Opis Menteri Pengintu Pengelantang, Orang Indu enggau Pemansang Ruang Bilik sereta Komiti Surau Darul Hassanah, Sourabaya Indah di Petra Jaya ditu, lemai ensanus.
Ku Fatimah ti nyadi Patron SPPA, bubur lambuk nya diberi ngagai peranak genturung pendiau Sourabaya Indah, orang ke datai besembiang ngagai surau nya sereta diberi ngagai Balai Bomba Petra Jaya.
“Aku meri terima kasih ngagai SPPA laban ti bejalaika tanggungpengawa ngagai mensia mayuh, tu pengawa ti manah sereta patut dipuji sereta dikemegahka.
“Kami ngarapka udah Hari Raya ila terus ulih gawa begulai baru enggau SPPA ngatur sebuah program besai enggau tuju ti besai agi, mantu orang ti tasah ketegal perang.
“Aku arap endar sereta andal ati kami ulih bejalaika program tu ila, laban aku meda penegap runding ke diayanka SPPA,” ku iya.
Kelimpah ari nya, Fatimah ngelalau mensia mayuh lebuh ti ngabang maya Hari Raya tu ila ngayanka pemanah ulah lebuh ba rumah orang.
“Apai indai enda tau enda nyaga pemanah ulah anak lebuh ke ngabang ngagai rumah orang tauka kaban belayan,” ku iya.
Berebak enggau tu iya ngarapka ruang bilik ti betapi enggau penusah bilun MAS MH17 ke terempas di Ukraine ngarapka sida liat ati sereta ngembuan penegap runding.
Sama bisi ba program nya kemari Direktor Biro Indu Noriah Ahmad, Presiden SPPA Mohd Radzi Bujang enggau kaban SPPA ke bukai.