Dikarang Judan Bungap //
Tu mega chara perintah BN ngenataika pengaga ati ketegal sukung rayat maya PRN dulu subaSIBU: Projek jematan konkrit nganti jematan kayu ngelayang Sungai Bawang Assan ke beungkus RM6.7 juta, kelai penyiru perintah Barisan Nasional (BN) ngagai rayat menua nya.
Sekretari Politik Kepala Menteri Andrew Shilling madah, projek besai nya diberi perintah kelai terima kasih ngagai pengundi dia ke balat nyungkung chalun BN maya pengawa bepilih nengeri (PRN) suba.
“Maya PRN suba, aku nemu, pengari rayat ditu ngelala baka ni sukung pengundi ditu.
“Kami berasai temegah ati laban rayat tauka pengundi di Bawang Assan nyentuk ke Sungai Melanggan enda kurang ari 78 peratus nyukung chalun BN,” ku iya maya bejaku ba pengerami Nasih Tanah Palan Projek Jemata Bawang Assan, empai lama tu tadi.
Pengerami nya dipenyadika Menteri Wang II ti mega Kaban Kunsil Nengeri (ADUN) Bawang Assan Dato Sri Wong Soon Koh.
Bela bisi datai maya tu iya nya, Sekretari Politik Kepala Menteri Christopher Thomas, Sapit Residen Sibu (program pemansang) Sapiah Daud, Injinia Opis Kereja Raya (JKR) Sibu Tiong King Wei, Pemancha Stanley Gramong, Penghulu James Semilan enggau bala bukai.
Projek jematan tu, 60.3 meter pemanjai diperambu deka tembu dalam kandang 21 bulan nganti jematan kayu ke udah dikena kira 60 taun ke udah.
Andrew mega andal sukung bala pengundi ba menua nya majak nambah maya PRN ti deka datai.
“Sukung kita mai reti ke besai ngambika pengari rayat kitai (Wong) chakah agi ngemansangka menua Bawang Assan enggau menua ke besemak,” ku iya sambil madahka iya pechaya pengundi diatu landik milih bagi sapa patut megai sida.
Berebak engga tu, Andrew mega ngenggaika petenah sekeda raban nengah Facebook madahka perintah BN enda ngereja pengawa ngandi jematan kayu ke udah lama nyad.
Petenah nya ku iya enda bepelasarka pengamat nambahka perintah BN diatu bangat ngemeratka isu nya lalu ngemendarka puku ti besai dikena bejadika projek nya.
“Aku pechaya jematan tu ulih mai penguntung ngagai enda kurang 2,000 iku rayat ditu sereta ngemuntangka pejalai enda kurang 1,500 iku rayat ari Tanjung Bekakap, Sungai Apong dan Sungai Melanggan.
“Jalai tu ngelantangka agi rayat ditu ti deka ngelawa kelinik, library, sekula primeri enggau sekondri,” ku iya nerangka baru.
Andrew mega minta bala penghulu enggau bala tuai rumah di Bawang Assan nyaup perintah matau pemujur projek jematan nya.