KUCHING: Parti Tindakan Demokratik (DAP) maya aum Pakatan Rakyat (PR) ke diatur kena bulan Mei 2014 udah mantaika isu pasal undang – undang hudud ke enda patut dipejalaika di Sarawak.
Ketuai DAP Sarawak, Chong Chieng Jen tegap penemu enda setuju enggau jaku ti dibantaika Ketuai PKR Baru Bian enggau Ketuai PAS menua Adam Ahid, kena 20 Julai ke nuduh DAP ti madahka undang – undang hudud nadai kala dikejakuka maya aum PR kena bulan Mei tu tadi, sereta mejal deka matak diri ari PR ketegal pekara nya.
“Aku udah mantaika isu bekaul enggau undang – undang hudud sereta minta PAS netapka runding sida maya aum bulan Mei, pia ku iya madah ba aum enggau pemberita ke diatur ba Indu Opis DAP ditu, kemari.
“Ba aum nya, PAS enggau terit enda nerima peminta nya. Aku ngumbai PKR ti diarika Baru Bian maya ke baum nya nyukung peminta aku, tang iya enda engkeretik ,” ku chong.
Ku Chong, nadai pematut Baru mansut penerang ke baka nya (Hari Minggu tu tadi) laban maya baum kena bulan Mei tu tadi, iya enda engkeretik sentang pekara nya.
“Aku ngaku diri enda lantang ati enggau meda PKR enggau PAS.
PAS ke patut mansutka penerang ke baka nya laban sida ke berat deka bejalaika undang – undang hudud di Sarawak,” ku iya.
Ku Chong, PAS bisi ngulu aum ke diatur enggau perintah besai kena Hari Empat minggu nyin tadi (berita nya dipansutka surat kabar China kena 18 Julai) ti betuaika Dato Seri Jamil Khir Baharom ke mega Menteri ba Opis Menteri Besai.
Ku iya, aum nya bekaul enggau pekara bejalaika undang – undang hudud ngambika keretas nya enda ibuh diubah konstitusyen perintah besai nengah Opis Pemansang Islam Malaysia (Jakim), ke alai sida ulih bejalaika undang – undang hudud sereta nadai diubah nengah konstitusyen.
“Kedua undang – undang hudup deka dipejalaika ba semua rayat Malaysia enda ngira bansa, jaku enggau jalai pengarap ke alai peminta Jakim nya udah dikemendarka Sapit Menteri Besai Tan Sri Muhyiddin Yassin, ku Chong “Ba runding aku aum pasal pengawa bejalaika undang – undang hudud ti nyeliahka ari diubah ba konstitusyen deka nyadi singkang keterubah endar nyadi menua Islam,” ku iya.
Chong mega madah, sida nyin udah setuju enggau pekara nya serta ngenukuka penemu diri pasal nya, nya alai diatu DAP enda ngemendarka pekara nya dipejalaika.
“Diatu pemutus nya udah ba jari ari PKR enggau PAS. Taja pan sida agi bisi kaul enggau PAS, PAS patut ngenukuka penemu sekalika sida deka ngena polisi ke ngelama tu, polisi enggau manifesto PR maya Pengawa Bepilih Besai Ke-13 sereta polisi sempekat menua Malaysia,” pia ku Chong.
Naka ke diatu PKR ngemeratka pekara nya.
Ku Chong, sida (PKR) patut ngenukuka pemutus diri pasal isu nya.
“Ukai semina kededua parti tu aja ke patut ngenukuka pemutus diri, tang Barisan Nasional pan patut sama.
Jakim ari baruh pegai Perintah Besai lalu DPM Tan Sri Muhyiddin Yassin nengah nadai belalai nyukung keretas Jakim nya,” ku iya.
“Semua parti komponen BN mega patut ngenukuka pemutus diri pasal undang- undang hudud laban nya ukai semina isu ti bekaul enggau PAS tauka UMNO aja.
Endang tanggungpengawa parti politik ngetanka konstitusyen sereta Sempekat Malaysia,” pia ku iya.
Nyempulang iya ba aum enggau pemberita nya, Mandal Chairman DAP Sarawak, Leon Jimmy Donald.