Dikarang Chris Bishop //
Bepun ari penumbuh UPP, ex-SUPP, Wong, Dr Jerip, Dr Johnnical, Ranum matak diri ngujungka parti nya majak mit
KUCHING: Pengudah Dato Sri Wong Soon Koh enggau tiga iku ADUN ke ditingkil ari SUPP nyerara diri ari Parti Tenaga Rakyat Sarawak (TERAS), Presiden Parti Rakyat Sarawak (PRS) Tan Sri Dr James Masing pechaya TERAS ukai parti politik kedua pemadu besai di Sarawak munyi ke diambu ketuai sida ngelamatu.
Hari Empat tu tadi, ba sebengkah aum pengarang berita ke bela digulu chalun presiden TERAS Tan Sri William Mawan, Wong (ADUN Bawang Assan) enggau ADUN Bengoh Datuk Dr Jerip Susil, ADUN Engkilili Johnnical Rayong sereta ADUN Opar Ranum numbuhka United People’s Party (UPP).
“TERAS ngambu diri nyadi parti politik kedua pemadu besai di Sarawak, tang diatu pekara nya enda munyi ke disebut suba, berindik ari empat iku ketuai dalam SUPP ke dulu suba ti bisi ati masuk TERAS tang diatu numbuhka UPP.
Aku enggai bejurai panjai senentang pekara tu, nangika salah utai disebut ketegal aku baru pulai ari menua China bejalaika pengawa perintah.
“Anti maya aku teulihka penerang ke silik agi senentang pekara politik ke nyadi di nengeri tu baru aku bejaku baru,” ku iya.
Iya mansutka jaku nya lebuh dirandau pemberita pengudah ngulu Pengawa Bebuka Puasa ke diatur Opis Menteri Pemansang Tanah begulai enggau raban nembiak ari Maahad Tahfiz Raudhatul Jannah 2014 di sebuah hotel ditu, malam ensanus.
Ditanya sekalika iya nemu penumbuh UPP, Masing ke mega Menteri Pemansang Tanah madah, iya semina nemu, UPP dirijista kena nganti SUPP enti parti nya dikinsil Opis Pengerijista Gerempung (ROS).
Tang pekara ke nyadi enda baka ke disadang, SUPP ukai semina enda dikinsil ROS tang sebengkah agi parti ke ngarika bansa Cina iya nya UPP ditumbuh.
Masing, seiku ari ketuai dalam BN ti enda setuju enggau pengingin TERAS diterima dalam gempung BN kelimpah ari Presiden SUPP Tan Sri Peter Chin Fah Kui enggau pemangku Presiden Parti Demokratik Progresif Sarawak (SPDP) Datuk Seri Tiong King Sing.
Penumbuh UPP ku iya dipeda nyadi sebengkah jalai kena mutarka pemuntan atur bebagika penuduk ketuai dalam TERAS.
Pengudah nempuh mayuh randau sereta mendingka timbal ari raban ke nyukung, empat ketuai ke ditingkil ari SUPP suba nyereta UPP lalu ketuai bukai (ex-SPDP) mengkang ba TERAS.
Bela datai Menteri Muda Pemansang Tanah Datuk Abdul Wahap Aziz enggau sekretari Mendam Opis Pemansang Tanah Datu Jaul Samion.