KUCHING: Menteri Pengereja Pengawa (KSM), Datuk Seri Richard Riot Jaem minta kompeni Sistem Penerebai Bilun Malaysia (MAS) ngenyampatka proses ngelala bangkai penumpang ke ditabanka bilun MH17 ke labuh di Ukraine apin lama ke udah.
Kebuah pia, ngambika Opis Gerempung Pengelikun Pengereja Pengawa Rama (PERKESO) ulih meri bantu ke patut ngagai ruang bilik ke dibai penusah bilun nya ti mega orang ke ngisi tabung PERKESO.
“PERKESO enggai ngelaunka bantu ke patut diterima penumpang MH17 ke parai, enti ulih kami minta lumur kad pengelala rayat Malaysia nyengkaum krew bilun nya.
“Enti enda ingatka lumur kad pengelala sida, lumur passport pan tau kena ngenyampatka bantu ke patut diberi ngagai kaban belayan sida,” ku iya madah ba aum media KSM bekaul enggau Bungkur PERKESO enggau penguntung bukai ke ulih dikelim ruang bilik krew sereta penumpang MH17.
Iya madah naka ke diatu, PERKESO udah meresa rikod seiku pasinjir, iya nya niang Meling Mula, 48, sida sebilik tau ngaga kelim ‘Faedah Pencen Penakat’ ke dibayar seumur idup ngagai balu iya, Simbut Kedit.
Penyampau pengabis mimit ke deka diberi ngagai balu Meling, iya nya dalam RM475 lalu deka ditangkanka bala anak iya ke berumur ari baruh 21 taun, enti sema balu iya nadai agi.
Berebak enggau pekara nya, ruang bilik niang Meling deka nerima ‘Faedah Pengurusan Mayat’ RM1,500.
Tang lain ba Ariza Ghazalee, 46 taun ke kemisi enda begaji nyadi Menijar Pelin Injinir enggau Rumah ba Opis Kaunsil Pemansang Bintulu (BDA) ke nitihka laki iya gawa di Khazakstan ari taun 2011.
Ku Riot, opis menteri nya deka meresa sekeda rikod bukai netapka ni bagi penguntung PERKESO ke ulih dikelim sida sebilik.
“Kami minta kededua ruang bilik ti bisi di Sarawak tu datai nagai opis PERKESO ke semak endur ngulihka penerang bukai enggau silik,” ku iya.
Ariza enggau laki iya, Tambi Jiee, 48 sereta empat iku anak seduai, Muhamad Afif 19, Muhamad Afzal 17, Marsha Azmeena 15, Marsha Afruz, 13 entara 298 pasinjir ti ditabanka MH17 nya labuh ditimbah di Ukraine, Hari Empat tu tadi.
Kelimpah ari nya, bantu ungkup penumpang MH370 ke lenyau maya penerebai ari Kuala Lumpur ke Beijing, China apin ditetapka opis PERKESO.
Tu berindik ari ‘Fatwa Kebangsaan’ ke netapka enti bangkai nya bedau ditemu, enda ulih dipadah lenyau baka nya aja.
Lalu pia mega, Undang-undang Antarabansa mega netapka enti bangkai nya enda ditemu dalam kandang tujuh taun, nya baru ulih dipasuk dalam kategori udah parai.
“Kami enda ulih mutarka pengawa tu seagi-agi bangkai sida iya apin temu,” ku iya.
Bisi 15 krew MH17 ke dilis tau nerima Skim PERKESO enggau ‘Skim Bencana Pekerjaan’ tauka ‘Skim Pencen Ilat’, iya nya Kapten Wan Amran Wan Hussin, Muhammad Firdaus Abdul Rahim, Hamfazlin Sham Mohamed Arifin, Dora Shahila Kassim, Sanjit Singh Sandhu, Mastura Mustafa, Azrina Yakob.
Lalu pia mega penerima, Shaikh Mohd Noor Mahmood, Lee Hooi Ping, Eve Choong, Nur Shazana Mohammed Salleh, Ahmad Hakimi Hanapi, Angeline Premila Rajandaran, Choo Jin Leong, Eugene enggau Mohd Ghafar Abu Bakar.
Sama bisi ngulu atur pengawa nya, Sekretari Politik KSM, Mejar (B)Peter Runin, Direktor PERKESO, John Riba Marin enggau pengari Opis Pengereja Pengawa, Oliver Kada.