Diatu, apai indai nembiak sekula majak nemu pemesai guna pelajar ba anak sida jemah ila
MURUM: Penyampau nembiak ngerijista diri masuk sekula di SK Tegulang, sebuah ari dua sekula ti ditumbuhka Sarawak Energy Berhad (SEB) ungkup peranak menua ti keruga tekat hidroelekterik (HEP) Murum.
Naka ke diatu penyampau nembiak nambah ngagai 120 ari 116 ba bulan April taun tu tadi berindik ari bansa Penan enggau Kenyah ti ngemeratka pekara pelajar.
Sekula ti ngembuan 13 iku pengajar tu bisi 74 iku nembiak lelaki sereta 46 indu ari primari 1 nyentuk 6.
Ku kepala pengajar sekula nya, Sibi Lang madah, apai indai nembiak ditu majak meretika pemesai guna pelajar ba anak sida kena napi pengidup jemah ila.
Sibi mega rindu meda pemansang nembiak di sekula nya ti udah nemu berandau ngena Bahasa Malaysia, nemu macha mengga mit lalu landik mega ngitung.
Mayuh nembiak ditu, nitih penerang Sibi, ke nadai seling ba pelajar lalu ari nya bala pengajar bisi ngatur kelas tambah kena mantu sida ba pelajar.
Nitih ku Sibi, “Terubah sekula nya ditumbuh, mayuh sida enggai nganjung anak ke sekula laban mar nadai rengka tambah mega suntuk belanja bebelika gari tauka penyikap sekula.
“Tang SEB majak besaup enggau sekula mutarka semua penanggul ti ditapi sida. Kena bulan Februari tu tadi, kompeni nya ngungkupka kasut, beg, baju sereta rengka bukai ngagai SK Tegulang,” ku Sibi.
SEB mega ngarap, nengah chara ti baka tu, nembiak sekula deka ransing agi lalu pia mega apai indai enda sanggu meransang anak sida ngulihka pemandai.
Kelimpah ari SK Tegulang SK Metalun mega nerima bantu ti sebaka ari kompeni tu.
Tu sebengkah tanggungpengawa rama ti dipejalaika sida kena nyaup peranak menua ditu.