KUCHING: Lapan belas bengkah barang udah ditetapks Opis Menteri Pengawa Dagang Dalam Nengeri, Gerempung Kerejasama enggau Pekara Bebeli Barang (KPNDKK) Negeri Sarawak deka diintu nengah Skim Nyekat Rega Barang Musin Pengerami Hari Raya Puasa 2014 berengkah kemari (20 Julai) nyentuk ngagai 5 Ogos tu.
Entara barang ke disekat rega nengah skim tu iya nya manuk idup, manuk setindit, manuk super, dagin chapi menua tu, dagin chapi import (rega maksimum di Sarawak aja), dagin kerbau import (India), telu manuk gred A, B enggau C.
Chabi merah, tomato, nyiur igi (rega maksimum renggat borong aja), nyiur parut (rega maksimum rengat renchit aja), bawang mirah mit (India), bawang besai import, bawang burak (China, ubi kentang import (China) enggau ikan gembung ti nyengkaum ikan mabung.
Tinjau Utusan Borneo di makit basah Pasar Emart Matang kemari mandangka orang dagang nitihka rega ke udah ditetap ke alai sida mega dipeda mantaika tanda rega bechura kalas.
Seiku penyual manuk Norfahana Roslan ,22, lebuh dirandau madah, sida udah nerima surat notis ari KPDNKK seminggu ke udah ti ngerintai bengkah barang ti deka dikemata rega rambau pengerami Hari Raya tu.
“Kitai nadai penanggul nurutka pinta ari KPDNKK ketegal pekara tu dikereja ninting taun tiap kali musin rami.
“Tanda rega bechura kalas deka diayan ungkup pengelantang orang meli lalu sida mega chukup lantang enggau atur ke bansa tu.
“Ba pengerami Gawai tu tadi kitai udah nurutka skim ke ditetap KPDNKK lalu diatu sekali agi kitai deka nurutka perintah ke sama,” ku iya.
Skim Nyaga Rega Barang Musin Pengerami dipejalaika nengah Akta Kawalan Harga enggau Antipencatutan 2011.
Nengah skim tu, raban orang dagang dipinta ngelekatka kelai rega bechura kalas ba barang ke dikemata nengah skim tu, sereta pia mega ba barang ke bukai ngambika pemeli nemu rega.
Orang dagang ti enda ngayanka rega barang ke dikemata nengah skim tu tau diukum mata duit manggai RM10,000 tauka kompaun RM5,000.
Kelimpah ari nya, kompeni ti ngereja penyalah ke sama tau diukum RM20,000 tauka kompaun nyentuk ngagai RM10,000.
Mensia mayuh ti bisi tetemu orang dagang enda nurutka perintah skim tu tau ngeripot ngagai opis menteri nengah email [email protected]; telefon ngagai lumur 03-8000 8000 1Malaysia One Call Centre (1MOCC); talian bebas tol 1-800-886-800; SMS ke 15888 ti naip “KPDNKK ADUAN tauka ngeriput terus ngagai opis KPDNKK ke semak di serata nengeri.