KUCHING: Bisi 18 bengkah barang deka dijaga perintah nengah Skim Nyaga Rega Musim Pengerami Hari Raya Puasa 2014 ti berengkah dipejalaika kemari (20 Julai) nyentuk ngagai 5 Ogos tu.
Direktor Opis Menteri Pengawa Dagang Dalam Nengeri, Koperasi enggau Pekara Bebeli Barang (KPNDKK) Negeri Sarawak, Stanley Tan madahka, timpuh skim nya dipejalaika dalam pengelama 17 hari enti dibandingka enggau ngelama tu ke semina 15 hari aja.
“Skim tu dipejalaika tumu dikena nyeliahka rega barang ke diguna maya bulan Ramadan enggau Hari Raya Puasa 2014 ditikika. Skim tu dipejalaika pengelama 17 hari iya ya berengkah 20 Julai ngagai 5 Ogos, ti nyaga rega 18 bengkah barang ke udah ditetapka.
“Dikearapka bala tauke tauka orang dagang nitihka rega ti udah ditetap ngambika orang di Sarawak ulih ngasaika penguntung ari skim tu,” ku iya seraya madahka diri temegah ati ngagai orang dagang ti mujur nitihka atur maya Skim Nyaga Rega Musin Pengerami Gawai Dayak 2014.
Iya mansutka pekara nya lebuh dikerandau raban pengarang berita, pengudah Program Jualan Dari Kilang -Jom Beli Barangan Raya & Pelancaran Skim Kawalan Musim Perayaan Hari Raya 2014 ti diatur ba palan pengengkah kereta RHB Emart Matang ditu, ensana.
Skim nya renggat nengeri Sarawak dipenyadika Menteri Muda ba Opis Kepala Menteri (Pemansang Orang Dagang Bumiputera) Datuk Mohd Naroden Majais.
Skim Nyaga Rega Musim Pengerami dipejalaika nengah Akta Kawalan Harga enggau antipencatutan 2011.
“Raban orang dagang dipinta ngelekatka kelai rega bechura kalas tauka mirah jambu ba barang ke dijaga nengah skim tu, sereta pia mega ba barang ke bukai ngambika pemeli nemu rega.
“Ngagai orang seseiku ti enda ngelekatka rega barang ke dijaga nengah skim ngena kelai bechura kalas, ulih didenda kot nyentuk ngagai RM10,000 tauka kompaun nyentuk ngagai RM5,000,” ku iya.
Lalu kompeni ti ngereja penyalah ke sama ulih didenda nyentuk ngagai RM20,000 tauka kompaun nyentuk ngagai RM10,000.
Entara barang ke dijaga nengah Skim Nyaga Rega Musim Pengerami Hari Raya Puasa 2014 iya nya manuk idup; manuk stindit; manuk super; dagin chapi menua tu; dagin chapi import (rega maksimun di Sarawak aja); dagin kerbau import (India); telu manuk gred A, B enggau C.
Chabi mirah, tomato, igi nyiur (rega maksimum renggat borong aja); nyiur parut (rega maksimum rengat renchit aja); bawang mirah mit (India), bawang besai import; bawang burak (China); ubi kentang import (China) enggau ikan gembung ti nyengkaum ikan mabung.
Orang mayuh enti tepedaka orang dagang enda nitihka undang-undang skim tu tau ngeripot ngagai opis menteri nengah email [email protected] ; telefon ngagai lumur 03-8000 8000 1Malaysia One Call Centre (1MOCC); lumur pechuma 1-800-886-800; SMS nuju 15888 enggau chara taip “KPDNKK ADUAN tauka ripot terus ngagai opis KPDNKK ke semak di serata nengeri.