BALINGIAN: Peranak di menua pesisir dipinta semampai besedia napi semua ubah dunya kena nangkup SCORE ti deka meri penguntung ngagai semua serak rayat di nengeri tu.
Kaban Kunsil Nengeri (ADUN) Tamin Datuk Joseph Mauh Ikeh madah, mensia mayuh anang ngembuan ulah ke mudah puas ati enggau semua pekara ke dikereja sida.
“Mensia mayuh mega patut seruran nampai jauh sereta tebuka runding ngambika ulih besemekih sejalai enggau pemansang menua Malaysia. Anang enda berubah.
“Ubah nya ulih dipejalaika nengah berubah chara tauka konsep betanam chara lama ngagai betanam chara komersil ti ulih mai penguntung ke besai,” ku iya.
Lebuh ke ngenang pasal pemesai guna mudal mensia dalam SCORE, Mauh ngelalau apai indai nentuka bala anak sida semampai nerima sistem pelajar ke manah.
“Pelajar ke diterima anak kita beguna amat kena nentuka sida ulih nyaup ngemansangka menua jemah ila,” ku iya.
Mauh bejaku munyi tu ba Pengerami Ketuai Begulai enggau Rayat di Rumah Abraham Anum, Sepiring, Balingian, empai lama ke udah. Bela bisi ngulu pengerami nya Kaunsilor Dr Ali Puji, Kaunsilor Mathew Ganggang enggau bala ketuai raban bansa ke bukai.
Tambah Mauh, peminta tinggi pengereja pengawa kena ngisi mayuh bengkah pengawa puang teknikal ke dibuka ba SCORE ila deka nyadi seiti peluang ke berega amat ngagai nembiak rebak baru.
“Kitai mega begunaka nembiak rebak baru ti ngembuan pengelandik profesionyel, teknikal enggau setengah landik kena ngisi pengawa puang ke deka dibuka ba SCORE di pelilih tengah nengeri tu.
“Nya alai, anang takut berubah sereta ngetu ngulihka pemandai. Enti kita sanggup belajar, kita nadai penanggul besemekih sereta setanding enggau orang bukai,” ku iya.
Berebak enggau pengerami nya, Mauh lalu nyuaka bantu geran Proje Mit Pemansang Menua Pesisir (MRP) RM10,000 ngagai Komiti Pemansang enggau Pengelikun Genturung Pendiau Rumah Abraham Anum.