UDAH BELABUH DIKENA: (ari sepuluh kiba) Augustine, Helmi enggau James sereta bala bukai maya ba feri ngelayang pasar Bintangor ke baru berengkah dikena, pagi kemari.
BINTANGOR: Udah ke nganti urung 10 taun, diatu lebih 1,000 iku bala ba seberai pasar Bintangor berasai lantang ati ketegal udah bisi feri besai dikena ngelayang ari pasar Bintangor.
Tu nyengkaum 17 buah rumah panjai, tiga buah genturung pengentap pendiau bansa Melayu, sebuah genturung pendiau bansa China, tiga buah sekula Primari enggau tiga buah tadika.
Pengulu Augustine Pau maya dikerandau pengarang berita madah, pekara tu endang udah lama dianti bala dia laban naka ke diatu semina bisi feri mit aja ulih dikena ngelayang ari seberai ke seberai.
“Nya pan semina ulih mai tubuh enggau mutosikal aja.
“Ketegal nya, bala ditu nadai chara bukai kelimpah ninggalka kerita sida ba pasar Bintangor enti deka mulai diri ke rumah,” pia ku iya madah.
Dulu agi ari nya, iya ke mega nyadi Penyanding Penemu Gerempung Tuai Rumah Pampang Meradong (PTRM) begulai enggau Ketuai Raban Nembiak PBB Pampang Meradong Kaunsilor Helmi Morsili sereta bala bukai betemu enggau Operator Feri James Wong ba feri nya pagi kemari.
Kelimpah ari nya, Menteri Pemansang Infrastruktur enggau Penyambung Dato Sri Michael Manyin Jawong bela bisi datai meda feri nya tengahari kemari sepemulai iya bejadika Kimpin Pengelikun Jalai Alun di Sarikei.
Nampung jaku iya baru, Augustine madah, feri tu mai reti ke besai ngagai rayat dia kelebih agi bekaul enggau pemansang pengidup.
“Ukai semina ngangkatka penatai pemisi rayat ditu pekara tu mega ngelantangka agi sida ke berundang gawa ari tu ngagai menua bukai.
“Pia mega bala pengajar ke berundang ari menua bukai udah tu ulih ngena kerita datai gawa kitu,” ku iya madah baru.
Beduduk ari pekara nya, Augustine ngarika rayat dia meri besai terima kasih ngagai perintah laban ulih mantupka pengingin ati sida ngelama tu.
Enggau nya, iya ngarapka rayat dia nemu bekenaka awak nya enggau manah kena ngangkatka pengidup diri.
Feri tu deka bejalai ari pukul 6 pagi nyentuk ke pukul 8 lemai ninting hari nyengkaum hari besai.
Tambang nepan feri tu iya nya RM1.00 sebuah kerita lalu mutosikal enggau orang ke nepan nya nadai dipinta bayar.
Taun seiti nyin suba bisi feri ke sebaka pemesai enggau feri nya kala dibai kia tang semina beoperasyen urung 10 hari aja.
Pekara tu balat ngasaka ati bala dia kelimpah ngujung macham bengkah penemu dibantai mensia mayuh nyengkaum gerempung ukai dikuasa perintah (NGO).