KUALA LUMPUR: Bala ketuai dunya berasai tekenyit endar ati ninga penusah ke nuntung bilun Malaysia Airlines (MAS) MH17 ke diripot terempas di Ukraine enda jauh ari garis entara menua Rusia kena Hari Empat tu tadi.
Menteri Besai Datuk Seri Najib Tun Razak dalam tweet iya madah: “Aku tekenyit endar ati ninga ripot ti madahka bilun
MH terempas. Kami deka bejalaika pansik enggau lengkas.”
Presiden Amerika Syarikat Barack Obama madahka penusah nya “tragedi yang dahsyat” ke alai Amerika deka meri sebarang bantu ke patut kena nyaup nentuka pengamat ke udah nyadi, sereta nama kebuah.
Ku Najib, raban bekuasa Ukraine perchaya bilun nya labuh ditimbak. Bilun nya benung dalam penerebai ari Amsterdam ke Kuala Lumpur sereta mai 280 iku penumpang enggau 15 iku anak kapal.
Menteri Besai Singapura Lee Hsien Loong mega madahka diri tekenyit sereta berasai sinu ati lebuh ninga berita ti nuntung bilun Malaysia Airlines nya.
Baka ke ditulis iya dalam Facebook, Lee madah: “Sampi sereta pengarap ati kami bisi enggau penumpang, anak kapal, sereta sida sebilik.”
Berebak enggau nya, Presiden Rusia Vladimir Putin meri penyinu ati ngagai Najib bekaul enggau penusah nya.
Dalam website, http://eng.kremlin.ru, madah “Presiden Rusia minta Menteri Malaysia ngenataika penyinu sereta sukung ari iya ngagai ruang bilik ke dituntung penusah nya.”
Ripot ejensi berita Reuters madahka Menteri Besai Belanda Mark Rutte sama bela berasai tekenyit endar ati ninga penusah nya.
“Aku tekenyit endar ninga ripot dramatik pasal bilun Malaysia Airlines MH17 ke terempas,” pia ku iya seraya madahka diri udah bejaku enggau Presiden Ukraine, Petro Poroshenko.
Bilun Boeing 777-200 Malaysia Airline Penerbangan MH17 bekejang ari Amsterdam pukul 12.15 pagi (jam Amsterdam) kena Hari Empat nuju Kuala Lumpur sereta dipelabaka sangkai di Kuala Lumpur pukul 6.10 pagi jam Malaysia kemari. — Bernama