KUCHING: Tiap kali sebedau sesebengkah pengerami diintu, orang dagang ke bejualka kek lapis di nengeri tu deka teulihka penguntung lebih dua kali lipat ngelui hari selama.
Tinjau ‘Utusan Borneo’ di Medan Pelita ensana mandangka orang dagang kek lapis ba tujuh buah kedai benung kiruh ngaga kek dikena napi pinta mensia mayuh nyerumba pengerami Hari Raya ujung bulan tu.
Seiku orang dagang, Sabtuyah Abang (S.A Kek Lapis Sarawak) madah diatu penyampau kek lapis ke digaga iya nambah dua kali lipat.
“Enti baka ke suah, kami semina ngaga 20 chuan kek ti tau ngasilka 200 iti kek. Tang ketegal Hari Raya deka diintu ba pengujung bulan tu, penyampau chuan nambah ngagai 40, iya nya enda kurang ari 800 iti kek dikeluar ninting hari.
“Ukai semina maya Hari Raya aja pinta tu nambah dua kali lipat, maya pengerami bukai baka ke Hari Gawai enggau Krismas kami mayuh nerima tempah,’ ku iya ke udah 3 taun bedagang di Medan Pelita ditu.
Iya nambah, tempah ukai semina datai ari dalam mengeri tu aja tang kek lapis iya enggau sekeda ke bukai dianjung ngagai Sabah, Kuala Lumpur enggau nengeri bukai di Semenanjung Malaysia.
Ku iya, dikena nentuka tempah nya ulih disedia, sida enggai nyadi enda kereja lebih ari jam ke suah.
“Dua tiga minggu sebedau rami, tempah deka majak nambah ari ke suah lalu nya meh maya kami berengkah kiruh lalu nambahka jam kereja nyentuk ke malam,” ku iya ke nerima bantu ari Pengurusan Pelita.
Kami enda nerima sebarang pesan seminggu sebedau Hari Raya, tandu iya.
Tujuh iku orang dagang tauka kompeni ngaga kek lapis ba begunan nya nerima bantu ari Pengurusan PELITA.
Sida disedia enggau kedai ke nyadi endur sida ngaga kek nengah siwa ke mudah kelimpah ti beri lun meli sekeda perengka ke besai.
Sebeluku kek lapis dijual nengah rega entara RM10 ngagai RM15 lalu tan pengelama 3 bulan enti disimpan dalam peti ais lalu enda kurang ari 20 macham kek lapis bisi digaga.