SRI AMAN: Apai indai dipinta meri kerejasama ngagai bala pengajar dikena nentuka anak sida bulih pemandai enggau meruan.
Menteri Muda Betanam Betupi Chara Moden, Datuk Mong Dagang madah, apai indai endang nyadi pengajar lumur satu ba rumah lalu sida meseti ngelalau bala anak ngaga pengawa ke dibai sida (anak) ari sekula.
Iya madah munyi nya rambau Program Tuai Begulai Enggau Rayat ke diatur ba Kampung Entulang Lallang ditu, apin lama ke udah.
Kaban Kunsil Nengeri (ADUN) Bukit Begunan tu mega minta apai indai seruran beratika pekara pelajar anak diri empu maya ba rumah.
“Mayuh apai indai ngumbai pengawa ngajar anak semina diteju ngagai pengajar ba sekula tang kebendar iya tanggungjawap ngajar bala anak mega patut disambung ba rumah,” ku iya.
Nangkan ke nya, perintah nengah Opis Menteri Pelajar udah nyediaka mayuh perengka guna dikena ngangkatka kualiti pelajar menua.
Udah nya, perintah mega bisi nyediaka mayuh program dikena meransang nembiak sekula belajar bebendar ambika chunto nengah pemeri bantu belanja.
Berebak enggau nya, Mong ngelalau nembiak sekula awakka nguna perengka internet enggau chara ke betul.
“Kitai sama nemu, kemaya hari tu program interent baka Facebook, WeChat, WhatApps, Twitter enggau mayuh agi ke bukai ulih alai bala pelajar berandau enggau pangan diri. Taja baka nya, sida patut bejimat-jimat laban nanggika diri kena tipu raban orang ke nadai betanggungjawap,” ku iya.
“Nya alai, laban diatu mayuh pelajar landik nguna komputer, nyadi aku nesau bala apai indai matau utai ke dipeda bala anak sida maya ba rumah. Rara sida nyema bisi nguna perengka komputer enggau pekara ke enda betul,” ku iya.
Berebak enggau nya, iya ngelalau rayat ba nguan sitak Bukit Begunan anang mudah mendiangka penemu raban orang ke nadai betanggungjawap. Naka ke diatu, mayuh bengkah pengawa digaga sida dikena ngelabuhka penau perintah kelebih agi ba kandang menua pesisir.
“Nama utai ke ngirauka ati aku jam ke diatu, mayuh penerang ke dibai sida ke nadai betanggungjawap ngagai rayat ba sitak Bukit Begunan endang jauh limpang ari utai ke amat.
“Nya alai, aku ngarapka rayat ti deka nemu polisi ke digaga perintah patut datai terus ngelawa ejensi perintah ke bisi ba Sri Aman,” ku iya.