KUCHING: Nembiak bukai dikearapka ulih belajar ari pekara ke udah nyadi ba ketetiga iku nembiak ‘pailang’, ti ngemakalka orang bukai pekara ke salah ba undang-undang.
Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah (gambar) madah enda ngira sekalika nembiak lelaki tauka indu enti ngereja penyalah nya deka nerima ukum ti sama.
Ari nya iya arapka pekara tauka penyalah ti sebaka nadai agi nyadi tauka ditandu nembiak sekula bukai di nengeri tu.
“Aku ngarapka ukai semina tiga nembiak tu aja ulih belajar ari penyilap diri tang mega nyengkaum nembiak sekula bukai ti enda ngira lelaki tauka indu, baka ngemakalka orang bukai laban nya pekara ti salah,” ku iya nengah sistem pesan pandak (SMS) seraya minta raban nembiak ngemeratka ulah tauka disiplin.
Nambahka nya Fatimah ngarapka ketetiga iku nembiak nya deka nyadi mensia manah agi sereta beguna jemah ila, pengudah pansut ari Sekolah Tunas Bakti (STB).
Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah bepenemu, asil ti positif nya mega begunaka sukung ari pengereja pengawa STK, nembiak nya empu, apai indai nyengkaum raban bansa.
Ku iya ba STB nya tiga iku nembiak nya deka diajar ari segi jalai pengarap, mental enggau fizikal sereta latih pengelandik dikena nyikap diri lebuh pansut ari palan nya.
“Ba STB sida deka diibun, diberi pelajar, latih enggau pengelandik vokasyenal, jalai pengarap, diberi perubat enggau dijaga pengerai.
“Aku besampika sida tiga ti dianjung ngagai STB nya deka nyadi orang ti manah agi nyengkaum ari segi fizikal, intektual, emosi enggau rohani. Lalu tu (asil positif) begunaka sukung enggau kerejasama pengereja pengawa STB, nembiak, apai indai enggau raban bansa,” ku iya.
Dalam ripot surat kabar kemari, Kot Majistret Kota Samarahan udah ngemutuska ketetiga iku nembiak ti beumur 16 taun nya dianjung ngagai Sekolah Tunas Bakti (STB) iya nya palan endur ngemanahka baru nembiak ti baruh umur ngelama dua taun.
Majistret Sulhairil Sulaiman madahka ketetiga iku nembiak nya diperintah bejalaika ukum tekala nya berengkah ari ensanus, sereta deka dianjung ngagai STB Miri, Melaka enggau Terengganu.
Seraya nganti maya dipindah ngagai STB, ketetiga dianjung dulu ngagai STB Telaga Ai ditu.
Kena 23 Jun apin lama, ketetiga nembiak indu nya ari sebuah sekula di Asajaya ngaku diri salah pengudah dituduh ngemakal enggau sengaja seiku nembiak Form Tiga ari sekula ke sama.
Sebedau tu ketetiga didawa ari baruh Seksyen 323 Kanun Keseksaan dibacha sama enggau Seksyen 34 akta ti sama enggau ukum jil nyentuk ke dua taun tauka ukum tauka kededuaka nya, enti ditemu salah.