KAPIT: Menteri Pemansang Tanah, Tan Sri Datuk Amar Dr James Jemut Masing minta bot ekspres, tabot, kapal kargo enggau palan nyual minyak ke melepung ngelingi penyikap perengkaguna penyangkai perau panjai Kapit dipindah enggau lengkas kena nentuka pengelikun orang ti ngempu perau panjai nya.
“Bot ekpress, kapal tabot, kapal kargo enggau palan nyual minyak ke melepung ngelingi penyangkai perau panjai Kapit patut dipindahka enggau lengkas kena nentuka pengelikun orang ti ngempu perau panjai nya. Kati gaya enti sema injin sepit perau panjai sida rusak, endaka perau panjai nya lalu tesepit ba baruh kapal tungkang. Uji peda kita, sekeda kapal din ngempang jalai penama ngagai palan penyangkai perau panjai ke tau ngenataika penusah ngagai orang ti ngempu perau panjai nya,” ku Masing madah ngagai pemberita pengudah meresa palan penyangkai sereta penyikap perengkaguna penyangkai perau panjai nya ba pasar baru ditu kemari.
“ Aku udah ngagauka Opis Kaunsil Sungai Sarawak (LSS) ngemuangka jalai penama ngagai palan penyikap perengkaguna penyangkai kapal perau panjai nya. Nya ukai palan penyangkai ungkup palan nyual minyak ke melepung, kapal tabot tauka tungkang, ke alai sida patut dipindah ngagai tebing seberai nyin. Enti amat bisi guna, LSS patut ngaga sebuah agi penyangkai kapal endur bot ekpress sangkai. Aku minta jalai penama nya dipuang ngambika orang ti ngena perau panjai ulih tama ngagai palan penyangkai sida enggau likun. Baka ke dipeda kita diatu, kapal nya ngempang jalai orang bukai ti betengahka sungai,” ku Masing.
“ Palan nyual minyak nya patut dipindah ngagai seberai nyin. Nya nadai nanggul laban sida nadai nyual minyak ngagai orang ti ngena kerita. Kapal tabot tauka tungkang tau sangkai din enti sema bisi perengkaguna seberai nyin,” tandu Masing
Ku iya baru, enti kapal nya dipindah ngagai endur bukai, nya ulih nyaup ngelikun sereta meresika agi tebing Sungai Kapit.
Dulu ari nya, lebuh Masing meresa penyikap perengkaguna penyangkai perau nya, iya bisi berandau enggau sekeda orang ti ngempu perau panjai ti sebana pasal pengelikun diri laban kapal ngempang penama ngagai palan penyangkai sida nya.
Sida minta bantu Masing mindahka kapal nya ngagai endur bukai.
Projek supervisor ari PWD (Opis Kereja Raya) Indu Opis Sibu, Franklin Bantin mega bisi meri penerang ngagai Masing pasal pekara nya.
Bela bisi dia maya nya Kaunsilor Jantai Masing, Kaunsilor Bakat Gira, Temenggung Tan Kian Hoo, Pemancha Yong Thu Fook enggau bala bukai
“ Penyikap perengkaguna penyangkai perau nya beguna amat ngagai orang ti ngempu perau panjai ditu. Sida ngena palan tu alai nanchang perau lalu naruh injin sepit sida ba endur ke likun agi dalam setur. Suwa nya ditentuka LSS. Iya mega madahka perengkaguna nya beguna amat laban mayuh orang ti bekenaka perau panjai ditu, ke alai sida beguna palan ke manah endur nanchang perau sereta naruh injin sepit sida ”, ku Masing.
Iya mega berasai gaga ati ninga penerang ari Opis Kereja Raya (JKR) pasal pemansang projek ti dipejalaika sida ke deka tembu endar digaga enda lama agi.
“ Ili nyin (tanah sepiak penyikap perengkaguna penyangkai perau panjai ), aku udah nyuruh Opis Kaunsil Pelilih Mit Kapit (MDK) minta perintah menua ngalau tanah nya ngambi bisi endur ngaga palan endur ngengkah kerita sereta makit endur bejualka asil kampung”, ku iya.
Aidyl Engineering Sdn Bhd, konteriktor ti udah dikearap ngaga ‘RC platform’ enggau tangga nyengkaum ‘mooring hook’ enggau ‘morning ring’ sereta utai bukai. Sida mega dikearap ngaga palan endur nganti, agu, bangku semin enggau 10 iti penuduk injin sepit ke ulih dipindah kin kitu ke beungkus RM 4,855,539 udah berengkah digaga kena 11 Mach 2013 nyentuk ke 10 Jun 2014 (15 bulan).