KUCHING: Opis Pekara Veteran (JHEV) nerima manah perambu ari Opis Menteri Ngetan Menua (MoD) ti deka numbuhka rumah arau dikena nyaga pengelantang veteran soldadu lebih agi sida ke diau kediri, sakit sereta kurang daya pendiau (OKU).
Direktor JHEV Nengeri Sarawak, Leftenan Kolonel Monday Juhid madah, palan tauka rumah nya ulih mantu ngurangka pemerat bala anak raban veteran soldadu ti udah tuai umur.
“Ba penemu aku enti perambu tu nyadi nyata ila, tu pekara ti chukup manah lebih agi ungkup raban veteran di sarawak ti dipelabaka bisi udah manggai umur 80 taun lebih deka majak nambah.
“Rumah arau nya senipak dikena ngurangka pemerat bala anak,” ku iya madah ngagai Utusan Borneo nengah sistem pesan pandak, kemari.
Monday mansutka penemu nya lebuh dipinta meri timbal bekaul enggau penerang Sapit Menteri Ngetan Menua Datuk Abdul Rahim Bakri ti madahka rumah arau lebih agi diungkup kena nyaga pengelantang veteran soldadu ke nadai orang enggau sebilik, sakit sereta raban OKU.
Nitihku iya dalam riput Bernama kemari, pekara nya diperambu deka diperundingka opis menteri enggau JHEV sereta Serakup Veteran Raban Soldadu Malaysia (PV-ATM).
Kelimpah ari nya Monday lebuh ditanya pematut endur rumah nya digaga, iya madah, rumah nya patut digaga ba tiap pelilih menua serata Sarawak.
“Enti dipeda sereta diperatika ari pemesai nengeri Sarawak, enti ulih diperundingka piak bekaul rumah arau tu patut bisi ba tiap genap pelilih nengeri tu,” ku iya.