KUCHING: Chairman Parti Keadilan Rakyat pampang Sarawak, Baru Bian sereta kaban parti nya, deka be-temu enggau Kepala Menteri Tan Sri Datuk Amar Ade-nan Satem, bekaul enggau Undang-undang Tanah Adat Bansa Asal (NCR) ti disadang deka diubah ujung bulan Julai tu ila.
Baru ti mega Kaban Kunsil Nengeri (ADUN) Ba’Kelalan madah, aum enggau Adenan nya lebuh maya sida sebuat betemu enggau iya maya merarau tengahari ba Aum Kunsil Nengeri (DUN) bu-lan Mei tu tadi.
“Kami deka betemu eng-gau Kepala Menteri baka udah diperambu bekaul enggau Tanah NCR, bekunsi enggau iya penemu, lalu udah nya barang ku Perintah milih chara ti dikena sida iya,” ku Baru lalu ma-dahka diri sedia deka nyadi Penyanding Penemu dalam pekara NCR enti Perintah begunaka penemu iya.
ePindaan Kanun Tanah Negeri’ dalam pekara NCR deka dibantaika maya aum DUN dalam bulan November tu ila.
“Dalam kot undang-un-dang sereta debat kami, kami mantaika mayuh kebuah iya patut diubah nitihka un-dang-undang Sarawak.
“Aku deka mantaika perambu nya, lalu udah nya ila nyangka Perintah tau mega nanya ngagai orang ketiga tang ba penemu aku, enti Perintah begunaka orang ketiga, orang ke patut di-ambi iya nya Kepala Hakim Sabah enggau Sarawak, Tan Sri Richard Malanjum laban iya nemu agi dalam kapasiti iya meri jaku lalau ngagai Perintah,” ku iya.
Sebedau nya, Baru nyadi chairman maya aum media bekaul enggau seiku plaintiff ti diarika iya, Rambli Kawi bekaul enggau 51 bidang tanah ke mungkur pemesai 547.49 ikar di Loba Ram-bungan, Kuching ti besak-sika ‘empat puluh tujuh Surat Semaya Nyerah Tanah Temuda (NCR)’ ti disain entara Rambli enggau orang ke ngempu tanah ti disilih enggau wang.
Nadai sebarang surat kala diberi ba 51 bidang tanah nya.
Nitih timbal ti diberi Opis Menteri Pengatur Pemansang Pengeraja Asal enggau Rampa Menua II nengah Seksyen 5(3) enggau (4) ari Kod Tanah (Cap.
81), sebengkah atur ke enda tau enda dititih, ‘semua tanah tauka hak adat ke dikelim nitih Loba Rambungan enggau Sungai Selang Ram-bungan, Kuching enggau tanah baruh hak nya mesti dipulaika ngagai Perintah Menua Sarawak’ ke mung-kur 51 bidang tanah.
Maya nya, Rambli diberi timpuh nitihka atur nya tauka ngaga kelim ke enda diterima defendan keteru-bah nengah surat ti dianjung kena 24 April 2002.
Beratika pekara nya, Ram-bli ke megai ‘Surat Per-janjian Menyerah Tanah Temuda’ (NCR) ke nyamin pengawa ke digaga nya betul, iya bisi betemu enggau niang Penghulu Sadam Hashim ke bisi kuasa atas tanah nya di Loba Rambungan, ngasuh iya meresa enti 51 bidang tanah nya amat NCR lalu diempu orang di genturung pendiau dia.
Rambli dipadah ulih Pen-ghulu Sadam, iya nya orang di genturung pendiau dia bisi hak ba tanah NCR Loba Rambungan lalu maya nya, iya (Rambli) diasuh betemu enggau Ketuai Raban Bansa niang Bujang Hassan eng-gau anak lelaki Penghulu Sadam, Mahli Sadam meresa sapa orang ke ngempu tanah NCR dia.
Plaintiff enggau Mahli udah nya betemu enggau Ketuai Raban Bansa Bujang ke lalu ari nya, netapka 47 ‘Surat Semaya Nyerah Tan-ah Temuda (NCR) disain plaintiff (Rambli) enggau orang ke ngempu tanah nya ba mua niang Bujang.
Rambli mega madah nga-gai kot maya nya, ‘Surat Semaya Nyerah Tanah NCR’ diambi ari Opis Tanah eng-gau Survei (JTS) lalu iya bisi dipadah atur nyerah sereta mindahka tanah NCR nya tau digaga komuniti Bumi-putera di menua tu.
Penerang ari plaintiff nya mega madahka adat Melayu, iya nya orang ke terubah iya diau ba tanah nya, lalu ngena tanah nya alai iya betanam betupi ngiga pemakai tauka ‘cari makan’ bisi hak ba tanah NCR nya lalu tanah nya mega tau diturunka ngagai anak uchu, tauka kaban belayan bukai tauka ngagai komuniti Bumiputera bukai.
Atur nya mega nitihka jaku penghulu di sitak nya, bansa Melayu bisi jaku ‘serah’ lebuh nyerahka tanah sida iya.
Kes tu keterubah iya dipechara dalam taun 2002 lalu udah menang kes nya dalam taun nya, tang Perin-tah Menua minta kes tu dipechara baru ba Kot Apil bedau lama tu tadi (2014) ke alai kes tu menang baru miakka Rambli.
Tiga raban aakim ke mendingka kes tu betuaika akim Datuk Abdul Wahab Patail, Datuk Balia Yusof Wahi enggau Dato Tengku Maimun Tuan Mat, mu-tuska kena 7 Julai tu tadi, iya nya pemutus Kot Tinggi enda nerima apil Perintah nengeri, lalu ‘Surat Semaya Nyerah Tanah TNCR’ nya ukai Semaya Jual enggau Beli tang sebengkah adat Melayu ‘serah’ ke dikena orang Melayu di Sarawak.
Nangkan nya, nitihka adat Melayu, orang ke keterubah diau ba tanah nya, ngiga pemakai betanamka buah sebaka reti ‘cari makan’ bisi hak ba atas tanah nya.
“Dalam jaku bukai, tanah NCR Melayu ke nyengkaum sitak tanah paya enggau tebing sungai alai sida betanam betupi ukai semina endur ngiga pemakai tang mega tanah NCR nitihka tusun adat, pengawa rama enggau pengarap orang Melayu Sarawak,” ku Baru.
Ba penemu Rambli, iya madahka diri beterima kasih ngagai semua sida ke udah mantu iya ngulihka hak tanah NCR nya.
“Nyangka tu meh perais ke pengabis manah maya Hari Raya tu ila ungkup kami sebilik tang aku arapka orang Melayu bukai nemu hak sida dalam pekara NCR Melayu, laban sigi bisi jaku munyi nya dalam adat Melayu,” ku iya.