Dikarang Rengenyan Labang
KUCHING: Ketuai raban bansa lebih agi tuai rumah (TR) tauka tuai genturung pendiau (KK) patut diau enggau nembiak redak ke dipegai sereta enda tau enda nitihka Seksyen 68 Adat Iban nyema pindah tauka enda diau ba genturung pendiau tauka rumah panjai ke dipegai.
Penghulu Philip Entawan (gambar) bepenemu, orang ke udah nyadi ketuai raban bansa lebih agi tuai rumah patut diau enggau nembiak redak, ke pengelantang enggau penyenang lebuh bisi pekara ditanya tauaka disain.
Iya bepenemu sesiku orang ke udah dichirika mangku pengawa nya patut ngereja pengawa enggau manah laban iya udah dikearap sereta dipechaya ngiring nembiak redak ti dipegai iya.
“Ketuai raban bansa lebih agi tuai rumah (TR) tauka tuai genturung pendiau (KK) dalam sepemanjai timpuh mangku pengawa nya patut bejalaika tanggungpengawa ti diungkup ke iya enggau manah ke pengelantang sereta pemaik nembiak redak ke dipegai.
“Lalu TR tauka KK ke dipilih nya patut diau enggau nembiak ba rumah panjai tauka genturung pendiau, tu ngemuntangka pengawa nembiak redak enti sida bisi pekara ditanya tauka disain.
“Enti sema iya udah pindah tauka enda diau enggau nembiak redak ke dipegai, iya patut enda belalai penemu ngagai tuan D.O, minta ampun sereta meri genselan nitihka Adat Iban, Seksyen 68,” ku iya lebuh dikerandau pengarang berita apin lama ke udah.
Iya mansutka pekara nya lebuh dipinta meri penemu bekaul enggau tanggungpengawa patut enda TR tauka KK enda begulai enggau nembiak redak ti dipegai iya.
Nitihku iya pasal TR tauka KK ke enda diau di rumah panjai tauka genturung pendiau bisi nyadi di nengeri tu taja pan enda mayuh.
Sapit Kepala Menteri Datuk Patinggi Tan Sri Alfred Jabu Numpang maya Aum Kunsil Nengeri bulan November 2013 kala madah, enti seseiku orang pindah ari rumah panjai nadai pemendar ari Pegawai Daerah (Tuan DO) tauka Penghulu, iya dipinta mayar ukum nitihka Seksyen 68, Adat Iban.
“Barang sapa ti pindah ari sebuah rumah panjai enggau nadai pemendar ari Tuan DO tauka penghulu ke nguasa, TR nya patut ditinggang ukum tauka adat mayar Dua Pikul kelimpah ari mayar tunggu 200 mungkul enggau genselan ti nyengkaum seiku babi, kering semengat enggau kurung semengat.