Dikarang Jacqueline R. David //
KUCHING: Mensia mayuh ke diau ba sitak Batu Kawa lalu bisi betengahka Jematan Chong Kiun Kong, Batu Kawa ninting hari diatu berasai lantang bendar laban jalai ari baruh jematan nya udah tembu.
Injinir Opis Kereja (JKR) Pelilih Menua Kuching, Awang Mohammad Fadillah Awang Redzuan madah taja pan peminta belanja nya udah lama dipinta ari perintah tang baru diatu projek nya mujur digaga manah lalu udah tau ditengah.
Projek tu diberi nama “Proposed Improvement Works of Jalan Rantau Panjang (section below Jambatan Chong Kiun Kong) Batu Kawa, Kuching” ke beungkus urung RM600 ribu.
“Batang penawa tu nyengkaum ngemanahka agi jalai alun ba baruh jematan nya, ditangkir besai, dibelakin kelimpah ngemanahka agi sistem parit sepemanjai jalai nya,” ku Awang Mohammad Fadillah.
Iya madah munyi nya ngagai pemberita pengudah nguluka Chairman Opis Kunsil Kandang Padawan (MPP) Lo Khere Chiang ngabas projek nya ba Pasar Batu Kawa ditu, kemari.
Iya mada batang pengawa nya nyengkaum ngemanahka agi sengkar jalai ba ujung jalai nya.
Pemanjai jalai nya kira 250 meter, belabuh digaga 25 Jun tu tadi lalu disadang tembu dalam kandang dua bulan.
“Kami ngarapka iya tembu ujung bulan tu, semina ngaduka batang jalai aja. Udah nya ila, baru kami ngemanahka agi sistem parit ba endur nya, digaga parit besimen nyengkaum kandang endur ngerimbai pendam China.
“Dikena meri pengelikun ngagai pengguna jalai alun, sengkar jalai mega deka digagaka bungkung jalai. Kami deka ngaduka jalai nya nitihka renggat, sereta bepanggai ba pemisi belanja,” ku iya.
Sebedau tu, jalai (baruh jembatan nya) mit mayuh udah rusak ketegal ditengah kerita berat (baka lori besai) nengah jalai nya, taja pan Opis MPP seruran ngemanahka jalai alun nya tang enda udah nya rusak baru.
Pemayuh kerita ke nengah jalai nya dijangka manggai 5,000 buah sehari (ambis nadai 2,000 buah kerita maya jalai sekut).
“Kekadang tau manggai 10,000 buah kerita sehari laban jalai tu baka jalai puntang ngagai mayuh endur,” ku iya seraya madahka jalai baruh jembatan nya tau disambung ngagai Sg Moyan, Pasar Batu Kawa Lama enggau sekeda endur bukai.
Pemesao jalai nya suba kira dalam tiga meter, tang diatu dibuka ngagai enam meter, lalu kualiti jalai pan nyauka sebaka enggau jalai besai ke bukai.
Pasal lampu jalai nya ukai dibaruh tanggung pengawa JKR, ku iya, laban JR semina betanggungjawap ngemanahka agi jalai alun.
Udah tu ila, nyangka deka ditambah enggau lampu ‘Tiger Eye’ awakka nyamai ditengah maya malam hari.
“Lampu jalai ukai dibaruh tanggung pengawa JKR tang kami deka minta belanja dikena ngaga lampu jalai. Enti nitih, kami udah minta perambu ngemanahka agi lampu jalai ba Pelilih Menua Kuching.
“Ni bagi utai ke dipinta rayat, udah dirintaika kami magang, lalu dianjung ngagai Indu Opis JKR awakka belanja ulih diberi, lalu ngarapka peminta nya dikemendarka perintah,” ku iya.
Iya nandu baru, ambika chunto lampu jalai ba sepemanjai Jalai Stephen Yong, endang sekeda ari sitak Batu Kawa, Jalai Matang-Batu Kawa mayuh bedau bisi digagaka lampu jalai.
Di Bandaraya Kuching, nadai tentu bisi penanggul laban mayuh udah digagaka lampu jalai.
“Lalu ba genturung pendiau di mengeri Kuching, lampu jalai nya endang batang pengawa Opis Kunsil ke megai sitak nya,” ku Awang Mohammad Fadillah.