Dikarang Judan Bungap
SIBU: Gerempung Ngemunas Dadah Malaysia (PEMADAM) Pampang Sarawak enggau Sabah betuaika Kelab PEMADAM UTM Johor udah raun ngagai menua Singapura, empai lama tu tadi.
Program ti disereta 350 iku orang tu berambaika leka jaku ‘Khidmat Komuniti- Hidup Penuh Erti-Negara Bebas Dadah Tahun 2015’.
Keterubah maya datai ba Singapura bala raban dibai raun ngagai Marina Bay, Bugis Street, Masjid Sultan Kg Glam enggau palan ti ngerinduka ati ke bukai.
Pengari gerempung tu ke mega seiku ari raban PEMADAM Pati Kanowit, Kaunsilor Encharang Jackie madah, program sida mega ngembuan tuju deka mai bala raban beratika pemujur pemansang dagang temuai ba menua nya.
“Awak tu mega dikena raban kami belajar ari chara perintah menua Singapura ngatur pemansang nyungkakka menua sida nyulut ari menua bukai.
“Ari program tu mega, bala raban kami ulih nambahka agi penemu ba diri empu seraya ke raun ngagai sekeda endur ke udah jauh mansang baka menua Singapo,” pia ku iya madah ngagai pengarang berita, kemari.
Taja pan raun dalam kandang sehari aja, ku Encharang, program nya mayuh bendar mai penemu ke baru ngagai bala sida.