KUCHING: Penulung Chairman Parti Keadilan Rakyat (PKR) Sarawak See Chee How madah, mayuh projek pemansang ke dipejalaika perintah ba kandang menua pesisir nadai ngembuan papan tanda projek.
Iya madah, berindik ari nya rayat ke diau ba menua pesisir nadai nemu penerang ke besangkut paut enggau kemaya projek nya deka tembu, ungkus enggau ni bagi kompeni ke diberi tanggung pengawa.
Ku iya, ari papan tanda ke nadai ayan nya mega ngujungka peranak menua pesisir pedis deka ngaga kompelin bekaul enggau projek ti mayuh tejanggal dalam timpuh ti kelalu lama.
“Ambika chunto ba Kampung Sekendu enggau Sungai Lingkau ba Simunjan ke nyengkaum projek ngaga jematan baru ditu tejanggal lalu rayat enda nemu kemaya projek tu tembu laban nadai papan tanda bekaul enggau projek nya,” ku iya maya aum pengarang berita ba opis iya di Batu 3 ditu kemari.
Nangkan ke nya, See madah ari papan tanda projek ti nadai mandangka timpuh projek, kompeni ke betanggungjawap enggau ungkus projek mega ngujungka opis bekuasa pedis deka nemu pemansang projek nya.
“Enti enda dipadah sapa orang ke ngaga projek nya baka ni orang deka nemu ni bagi kompeni ke betanggungjawap…pekara tu tentu meri penanggul ngagai opis bekuasa pelilih menua,” ku tandu iya.
Berebak enggau nya, iya mega ngasaika ari papan tanda ke nadai diengkah nya nyau baka orang ke ngereja projek tu nadai lurus lebuh bejalaika projek ungkup rayat ba menua pesisir.
“Aku ngarapka Kepala Menteri baru ulih beratika pekara tu enggau lengkas sereta ngatur iya ngambika projek pemansang ba kandang menua pesisir nadai agi tejanggal,” ku iya.