SIBU: Kira 500 iku nembiak udah ngaku tanda semaya enggau Menteri Wang Kedua, Dato Sri Wong Soon Koh nyanggup diri deka napi pemar ngepun ka pejalai politik baru begulai enggau Parti Tenaga Rakyat Sarawak (TERAS).
Raban nembiak nya betuaika chairman pengatur, Toh Jack Kuong nyuaka pom masuk nyadi kaban TERAS ngagai Wong rambau Pengerami Makai Malam Sibu Youth Solidarity Night, ditu apin lama ke udah.
Wong madah, tebal agi bala nembiak tu bedau kala masuk ni-ni parti politik lalu enggau ati ke nadai diansak sida nyanggup diri nitihka iya ngerembang politik baru.
“Penatai raban nembia tu deka nyadi orang ke ngiring Barisan Nasional (BN) Negeri. Enggau juluk ke baru, peranak mengeri deka ngembuan jalai puntang ngelawa BN,” ku iya.
Iya madah, diatu udah datai maya iya rayat kelebih agi raban bansa China besaup ngenegapka politik.
“Dibanding enggau suba, peminta enggau peneka raban bansa China semina datai ngagai BN nengah Komiti Besai Parti Seati Rayat Sarawak (SUPP).
“Utai tu udah berubah. Kitai diatu ngembuan jalai puntang terus ungkup diri empu,” ku iya.
Wong madah, kaul Sibu enggau Opis SUPP udah lama merenggang kenyau tiga taun ke udah ditambah enggau kompelin ari 14 bengkah palan endur pengawa bepilih ba renggat pampang.
“Tu ditangkan enggau pekara ke enda manah dlam parti lebuh bala kaban ke nadai lantang ati ngaga kompelin ngagai Opis Pengerejista Gerempung (ROS).
Kelimpah ari nya, Opis SUPP mega ngaga sida baka munsuh lalu utai nya bepengujung lebuh iya dua kali kena buah dalam timpuh lima bulan lalu baka kaban bukai mega kena pangki.
“Mayuh kaban nerima surat ngerintaika kebuah minta sida ngerintaika kebuah ngambika sida enda kena ukum.
“Lalalu aku ngagai Opis SUPP, anang masau jam bekaul enggau isu tu. Sida (kaban TERAS) udah besemaya kini-kini pejalai singkang sida tetap nitihka aku,” ku iya.
Menteri Perintah Pelilih Menua enggau Pemansang Raban Bansa nya madah, penatai raban nembiak masuk TERAS nandaka seiti pengarap ke baru dalam kuing politik baru.
“Pengudah 500 iku nembiak tu masuk TERAS malam tu, beribu iku kaban SUPP deka nitihka singkang kitai laban leju meda pekara ke enda betul ba peringkat pampang 2011,” ku iya.