KUCHING: Sebuah tungkang ke ngundan 180 batang kayu dipelabaka asil ari pengawa nadai belesen udah ditan beserimbai enggau operasyen begulai dipejalaika Ejensi Penerit Adat Tasik Malaysia (APMM) Pelilih Maritim (DM11) enggau Opis Kampung Sarawak kena 24 Jun tu tadi.
Ketuai Penerit Adat Maritim DM11 Komander Maritim Hariani Mahmod madah, semua batang kayu ke nadai ngembuan kelai ari Opis Kampung Sarawak sereta dipelabaka ngelanggar Undang-Undang Kampung Sarawak 1973.
Iya madah, tiga iku pekereja peranak menua luar ke bisi dalam tungkang nya mega ditangkap maya operasyen ke dipejalai urung pukul 2.45 lemai ba Sungai Loba Semareng lalu kes nya diserah ngagai Opis Kampung Sarawak ngambika dipansik enggau silik.
“Asil tangkap ke pemadu baru operasyen begulai tu tesidika sebuah kapal tungkang ngundan urung 180 batang kayu.
“Kayu tu nadai ngembuan kelai ari Opis Kampung Sarawak lalu dipelabaka ngelanggar Undang-Undang Kampung Sarawak 1973,” ku iya rambau aum pengarang berita ba Kompleks Maritim Tun Abang Salahuddin (KOMTAS) kemari.
Iya madah, operasyen begulai enggau Opis Kampung Sarawak berengkah kenyau 25 April tu tadi lalu lima iti kes udah mujur ditangkap sida.
“Maya operasyen begulai nya, dua ari lima bengkah kes ke mujur ditangkap nya didawa dipelabaka ngundan asil batang kayu ke berega 3,059 enggau asil bukai RM43,303.75.
“Udah nya, tiga iti agi kes agi benung dipansik. Semua kes tu dipansik Opis Kampung Sarawak,” ku iya.
Hariani madah, semua orang ke ngempu tungkang nya peranak menua tu.
Operasyen nya dibantu tiga buah bot APMM DM11 ke ditepan 15 iku pemesai APMM enggau enam iku pemesai ari Opis Kampung Sarawak.
Nangkan ke nya, iya madah kerejasama enggau Opis Kampung Sarawak udah lama dipelajalai kenyau ari suba tang operasyen nya chakah agi kenyau April tu tadi.
Sama bisi datai Direktor Operasyen APMM DM11 Komander Shahref Steve Macqueen enggau Pemesai Operasyen DM11 Leftenan Maritim Mohd Razif Zaidi.