KUCHING: Pemangku Presiden Parti Demokratik Progresif Sarawak (SPDP) Datuk Seri Tiong King Sing madahka diri berasai asa sereta nyukung penemu ke dipansutka Presiden Parti Rakyat Sarawak (PRS) Tan Sri Datuk Amar James Masing ke bela asa meda ubah dalam kabinet perintah besai apin lama ke udah langsung nadai milih pengari ari kededua parti nya.
Dalam penerang ke dipansutka kemari, Tiong nyemetak madahka diri berasai sinu meda Menteri Besai Datuk Seri Najib Tun Razak langsung nadai milih seiku ari Kaban Parlimen SPDP megai tanggung pengawa dalam kabinet taja pan parti nya udah menang ba semua empat kerusi ungkup sida empu maya Pengawa Bepilih Besai (PRU) ke udah.
Taja pan ex presiden SPDP, Tan Sri William Mawan antara Kaban Parlimen ke udah pansut ari parti, Tiong madah parti nya agi bisi ngembuan Kaban Parlimen ke pintar sereta ulih mangku sebarang tanggung pengawa dalam kabinet perintah besai.
Seraya meri jaku puji ngagai parti MCA enggau GERAKAN, Tiong ngelaluka penatai parti dua bengkah nya dalam politik nengah ubah baru nya.
Berindik ari pemulai MCA enggau GERAKAN ngagai kabinet, ku iya, dua bengkah parti nya ulih meri servis ke manah ngagai rayat.
“Baka nya mega SPDP, nyema kami bisi pengari dalam kabinet perintah besai, kami deka meri servis ke lebih manah ngagai rayat ba menua pesisir,” ku iya.
Ba penemu Tiong, nyema Barisan Nasional (BN) deka meda pengulih sida manah agi dudi hari, Najib meseti mai semua semua parti komponen BN dalam kabinet perintah besai.
“Kami ngarapka Menteri Besai nemu utai ke dikenanggika kami lalu ngungkupka tanggung pengawa dalam kabinet perintah besai enggau chara adil ngagai SPDP engau PRS laban kami udah nulung meri semilan buah kerusi (Parlimen) ngagai negeri,” ku Tiong.