KUCHING: Gerempung Orang Buta Sarawak dalam perambu deka ngemanahka baru rumah lama palan nya, ngambika ulih nyadi endur mayuh guna ke kaban gerempung.
Chairman gerempung nya, Dr. Dennis Kong Ket Ming madahka entara pekara ti diperambu nyengkaum numbuhka palan muzik dikena ngelatih kaban gerempung, servis dobi tauka nuchi gari, mini gimnasium enggau kuaters.
“Nengah semua pekara ti diperambu nya kami ngarapka ulih nyendiaka peluang gawa ngagai kaban gerempung nyengkaum baka dikanggauka merindang ba sesebengkah pengerami.
“Palan dobi tauka nuchi gari udah tentu deka meri peluang gawa ngagai kaban (gerempung) kami seraya nambahka penatai pemisi gerempung ngambika bisi diberi ngagai semua kaban gerempung,” ku iya.
Iya mansutka pekara tu lebuh ke dikerandau ba pengerami Gawai Dayak 2014 begulai enggau Sarawak Badan Amal Tenaga Isteri-isteri Menteri (SABATI) ti diatur ba Palan Orang Buta Sarawak ditu, kemari.
Bejaku baru Dr. Dennis madahka ungkus belanja dikena bejalaika pengawa ngagapalan nya baru dipelabaka urung RM2 juta lalu diatu benung nyebut rega projek.
“Pengawa ngaga baru rumah nya disadang deka berengkah pun taun baru sereta dipelabaka tembu taun 2016,” ku iya.
Dr. Dennis ba pengerami nya madah gerempung nya ditumbuhka dalam taun 1960 sereta ngatur mayuh macham atur pengawa enggau program dikena mantu raban orang buta.
Kelimpah ari nyendiaka endur diau ngagai sida ti begunaka nya, gerempung mega meri latih pengelandik baka ngurut enggau ngaga barang pengelandik jari ngambika sida ulih ngatika diri.
Nambahka nya, gerempung mega ngatur meresa mata anak mit ngambika penanggul buta ulih ditemu tumu.
Atur pengawa nya dibantu 16 iku pakar mata ke enda begaj lalu gerempung nya mega chakah bejalaika pengawa meresa mata di serata Sarawak dikena nyeliahka mensia mayuh ari buta.