MATU: Pengelantang dalam ruang bilik beguna amat dikena nempa perangai bala anak ke benung mansang besai.
Bini Kaban Kunsil Nengeri (ADUN) N.38 Jemoreng, Dayangku Normaliza Awang Tambi madah, penyenang enggau pengelikun nyadi batang pekara ke tau nempa sida nyadi orang ke menyana.
“Ba pekara tu apai indai patut nunjukka chunto ke manah ngambika bala anak mansang besai ba endur ke manah.
“Lebuh anak meda apai indai bebasaka aki ini sida, sida mega deka bebasaka apai indai diri dudi hari,” ku iya lebuh bejadi Pengerami Hari Indai enggau Misi (NBOS 7) ba Dewan Serbaguna Kampung Tian, apin lama ke udah.
Iya madah, hari indai ukai semina dirami maya haribulan nya aja, tang patut disambut sepemanjai maya.
Normaliza madah, nyendiaka palan endur ke lantang ungkup bala anak beguna amat awakka pemansang pikir enggau ulah sida ulih ngerembai enggau manah.
Iya madah, perangai enggau penemu genap iku anak patut ditempa kenyau ari mit, lalu sida sebilik meh ke ngiring ngembing sida nyentuk ke sida besai.
“Ngerami hari indau ukai semina nyebut leka jaku sayau, tang patut dipandangka nengah utai ke dipeda enggau bisi reti.
“Seiku indu ke begelar indai patut seruran digaga nyadi seiku orang ke pemadu dipebasa sereta diberi penyayau. Bantu enggau ibun meh bala indai enggau manah-manah enda ngira ari segi reta tengkira, tubuh enggau ati sida.
“Kati enda pia, tanggung pengawa enggau pemanah ke udah digaga indai enda ulih sukat. Indai meh orang ke sanggup berambun nyawa maya ngandung enggau ngadaka anak.
“Udah nya, indai enda badu-badu bejalaika tanggung pengawa sida ngajar, endur bala anak meraya, mantaika sebana enggau mantupka penyinu ati,” ku tandu Normaliza.
Sama bisi datai ba pengerami tu Ketuai Misi Pelilih Menua Matu, Nurhayati Abang Daud enggau Ketuai Misi Pelilih Menua Dalat, Norlela Deris.
Program nya diatur Klinik Pengerai Pelilih Matu lalu digulu lebih 200 iku rayat ke semak endur nya.