ENGKILILI: Kaban Kunsil Nengeri Engkilili (ADUN) Dr Johnnical Rayong Ngipa ngelalau bala ketuai raban bansa dalam sitak (DUN) Engkilili suah agi betemu enggau bala nembiak redak sereta mutarka penanggul ke ditapi sida seraya ngemansangka rumah panjai sida.
Ku iya, pengasi pengawa ti dipejalaika perintah bepanggai ba ketuai raban bansa lebuh ti bejalaika tanggungpengawa ke nyadi ketuai ba rumah panjai.
“Aku arapka sida ulih nyaup perintah ngemansangka tikas ekonomi nembiak redak di rumah panjai sida,” pia ku iya lebuh ke nemuai enda lama ngagai Rumah Panjai Buyong Panjai, Lidong, Engkilili kemari.
Kelimpah ari nya, iya mega ngelalau bala ketua raban bansa di DUN Engkilili bekerejasama enggau pangan diri ngambi ulih ngemujurka sesebengkah program ba kandang menua sida.
“Beri meh kerejasama ngagai pangan diri kena ngemujurka sesebengkah program ti ulih meri pemaik ngagai rayat ke ari baruh pegai kita,” ku iya.
Nengah awak nya, Dr Rayong ngungkupka belanja RM100,000 ngambika bisi dikena ngaga parit ngelingi rumah panjai kelimpah ari nyuaka chek RM10,000 ngagai JKKK Rumah Panjai Buyong, Lidong.