Dikarang Chris Bishop //
Protem pampang serata Sarawak benung ransing ditusun diatu
KUCHING: Chalun Presiden Parti Tenaga Rakyat Sarawak (TERAS) Tan Sri William Mawan pechaya sekeda raban pengari rayat ke ngembuan runding dua tiga deka nyereta parti nya dalam timpuh ke semak.
Nyaut tanya pemberita sentang ulah MP Baram Anyi Ngau ke ngalih nyereta Parti Progresif Demokratik Sarawak (SPDP) baru pengudah nyereta TERAS enda lama, Mawan madah pekara ke baka nya ukai baru dalam dunya politik lalu iya pechaya Anyi enggau raban ketuai bukai ke nyengkaum bala penyukung deka nyereta TERAS.
“Nya meh gaya politik kemaya hari tu, sekeda nya ngalih enda lama, lalu deka ngalih baru lalu udah nya ngalih agi ke bukai.
“Aku pechaya sida tu deka pulai nyereta TERAS lalu baka nya meh bala penyukung bukai ke udah netapka pemutus runding nyereta TERAS,” ku iya pengudah nerima penemuai raban protem TERAS pampang Muara Tuang betuaika Chairman Protem Konselar Tr David Jiku di Opis iya ba Begunan Baitulmakmur kemari.
Mawan ke diberita mangku pengawa Presiden TERAS pengudah Gempuru Besai Tiga Taun Sekali (TGA) kenaka 26 Julai tu ila sekali agi madah, mayuh agi orang bukai deka nyereta TERAS ke alai mayuh protem pampang serata Sarawak benung ransing ditusun diatu.
Enda mansutka penyampau protem ke ditumbuh, Mawan madah pengeran sida nyereta TERAS beduduk ari penetap parti nya ti sigi nyukung Barisan Nasional(BN).
Ngenang sentang jaku Presiden Parti Rakyat Sarawak (PRS) Tan Sri Dr James Masing ti madah TERAS enda patut diterima dalam serakup BN, Mawan ke mega Menteri Pemansang Rama madah Masing ngembuan hak mansutka penemu diri lalu nya ukai keterubah iya mansutka penemu nya.
“Ukai sekali iya (Masing) mansutka penemu munyi nya, iya ngembuan hak bejaku lalu baka nya mega aku.
“Tang aku nadai kala bejaku ngelui ari adan ke patut,” ku Mawan.
TGA kena 26 Julai tu ila disadang nyadi endur TERAS milih raban ketuai dalam parti ke baru nya ke alai pengudah nya (muak ke malam) seiti gempuru makai lemai ke digulu beribu iku kaban dalam TERAS deka diatur di Emperial Hotel ditu.