Taja pan tanah ke mesai lima ikar nya deka dikemansang tang pesaka lama ngelingi tanah nya deka ditanka
Dikarang Chris Bishop //
KUCHING: Perambu pemansang ti deka dipejalaika ba tanah ti mesai lima ikar di Genturung Pendiau Siol Kandis ke diempu Gerempung Dayak Sarawak (SDNU) deka ngemeratka pemaik peranak asal genturung pendiau nya.
Chairman SDNU Tan Sri William Mawan madah Indu Opis SDNU enda ngambi penguntung ari perambu projek pemansang ke diatur begulai enggau perintah tang peranak asal Genturung Pendiau Siol Kandis deka dulu dikemerat.
“Aku keran matak runding sida ngambika bela beratika tanah ti mesai lima ikar nya nyadi sebengkah aset ti tau dikemansang lalu mulaika penguntung ba pekara ekonomi.
“Kitai enda ulih semina berundingka pekara ti bekaul enggau main asal aja, kitai patut berundingka sekeda konsep ekonomi lalu matak peranak asal genturung pendiau nya ngambi bagi ba pemansang ke dipejalai dia.
“Peranak asal lalu ditangkanka nembiak rebak baru genturung pendiau nya deka bulih pemaik ari projek pemansang nya lalu kitai ukai semina keran nentuka pesaka lama ke dikembuan dia ditan enggau manah,’ku iya.
Mawan mansutka jaku tu lebuh dikerandau pemberita pengudah nerima penemuai raban SDNU pampang Siol di opis iya Begunan Baitulmakmur ditu, kemari.
Iya ke mega Menteri Pemansang Rama madah pekara ti ngusutka runding raban SDNU pampang Siol nya udah diterang ke iya enggau silik ba penemuai sida seraban kemari.
Ku iya, perambu Indu Opis SDNU nengah kerejasama enggau perintah ti deka ngemansang tanah nya udah nengenyitka raban SDNU pampang Siol enggau peranak Kampung Siol Kandis.
“Aku udah nerangka konsep enggau tuju projek pemansang ke diperambu ke alai sida mega keran deka ngenanka semua utai ti dikemisi ngelingi tanah nya ketegal ti udah lama diau mendam dia.
“Aku ngenukuka semua pesaka lama baka ke gerija, Balai Mensia Mayuh, pendam sereta begunan enda dikachau lalu deka diintu enggau manah,” ku iya seraya madahka opis menteri iya mega megai kuasa ba pekara ke bekaul enggau pesaka lama.
Ngenang sentang Balai Mensia Mayuh ke ngembuan mayuh sejarah di Kampung Siol Kandis, Mawan madahka iya deka nemuai meda Balai Mensia Mayuh ke dipenyadi niang Tun Jugah dalam taun 1965 kelia.
Ku iya, Balai Mensia Mayuh nya deka bediri tegap dia lalu deka dikemanah agi ngambika mengkang ulih diguna ungkup timpuh lima puluh taun ke deka datai.
“Mayuh sejarah udah ditempa Balai Mensia Mayuh Kampung Siol Kandis lalu aku deka nentuka palan nya dikemanahka baru,’ku iya.
Ba kaul ke sama, Mawan madah perambu ngaga kodominium ba tanah lima ikar nya benung diperunding lalu iya nyadang nadai penanggul nerima pemendar ari perintah ketegal ti digaga nengah kerejasama Opis Menteri Pengawa Berumah.
Bela bisi enggau lebuh ke nemuai nya Chairman SDNU pampang Siol Pani Igoh, Pengulu Philip Tawan enggau orang bukai.