DEBAK: Rayat patut begempung ba pengawa ngetanka penyerakup bansa enggau pengelantang di nengeri tu ngambika rayat ulih idup nyamai sereta likun, ku Menteri Bekebun Bedandang Besai enggau Komoditi Malaysia, Datuk Amar Douglas Uggah Embas.
Ku iya, rayat di nengeri tu patut ngenegapka penyerakup bansa ngambika agenda politik pemansang perintah ulih dikerembai sereta diasaika rayat.
“Enti kitai pambar semua perambu perintah ungkup rayat enda ulih dijapai sereta dipejalai ti tau ngujungka pengidup rayat tejanggal,” pia ku iya lebuh bejadika Program Gawai Ngiling Bidai 2014 ba Dewan Perpaduan Masyarakat Debak, Betong ditu malam ensanus.
Uggah ke mega Kaban Parlimen Betong madah, penyerakup ti udah lama diasaika kitai patut ditanka laban nya meh sebengkah ari pekara ti mai pengelikun ngagai pupu raban bansa di nengeri tu.
“Perintah enggai meda penyarut ke nyadi ba sekeda menua luar baka ti dipeda dalam televisyen enggau surat kabar nyadi di menua tu, laban enti rayat enda ngemeranka penyerakup sereta bebatak asur enggau pangan diri pekara ke baka nya tau nyadi ditu,” pia ku iya.
Ku Uggah, kitai patut bebasaka adat asal enggau chara pengidup pangan diri. Baka ba pengerami tu bansa Melayu, Iban enggau China ulih begulai lalu sama bela berami enggau pangan diri. Tu meh penyelai kitai di Sarawak ti ngemeranka Konsep 1Malaysia ke alai semua pupu raban bansa ulih idup begulai enggau pangan diri.
Dulu ari nya, Uggah nyuaka insentif nembiak ke nyulut ba peresa Sijil Pelajaran Malaysia (SPM) enggau Peperiksaan Menengah Rendah (PMR) 2014, ke alai pemeri nya datai ari Komuniti Bestari Rimbas.
Nengah awak nya mega Uggah lalu ngungkupka agih belanja RM15,000 ditangkanka Kaban Kunsil nNegeri (ADUN) Saribas, Ricky @ Mohamad Razi enggau ADUN Bukit Saban, Robert Lawson Chuat sama bela meri RM5,000 ngagai raban pengatur pengerami.
Temuai ke bisi ngulu pengerami malam nya mega diperindang dua iku penanyi Iban ari menua tu.
Bela bisi ngulu pengerami nya Menteri Muda Pengintu Pengelantang Pendiau Nengeri Sarawak ke mega Kaban Kunsil Nengeri Bukit Saban, Robert Lawson Chuat, ADUN Saribas, Ricky @ Mohamad Razi Sitam, Residen Betong, Datu Romie Sigan Daniel, bala ketuai opis perintah, ketuai raban bansa sereta urung seribu iku peranak ari kandang menua Saribas enggau Bukit Saban.