KUCHING: Pengawa madamka api maya penusah angus enggau nyelamat lebih agi di menua pesisir deka lebih muntang sereta jampat berindik ari perambu penumbuh raban bomba bantu di nengeri tu.
Sapit Direktor Bomba Nengeri Ali Bahudin madah, penumbuh raban bomba bantu nya udah dikemendarka perintah 8 Mei tu tadi.
Nitihku iya pengawa bomba bantuan nya lebih beratka kandang endur ti jauh sereta ke bisi risiko nyengkaum nadai penyambung jalai alun.
Bejaku baru iya madahka raban bomba bantu nya deka nerima elawin maya gawa tauka belatih.
“Ke diatu kami agi merambu skop penumbuh iya di nengeri tu. Dipelabaka penerang madahka ngambi raban nya deka dikeluarka bulan Julai tauka Ogos taun tu,” ku iya lebuh ditelefon kemari.
kelimpah ari nya iya madahka raban bomba bantu deka sama besaup enggau raban bomba tetap sereta bisi balai bomba kelas D ti beungkus kurang RM1 juta.
“Raban bomba bantu deka ditumbuh nitihka pematut baka di kandang menua pesisir sereta jauh ari balai bomba besai,” ku iya.
Ali nerangka, orang ke dipilih nyadi raban bomba bantu nya sida ti diau ba kandang endur balai bomba bantu ditumbuhka.
“Nyema ke digaga di Tatau, Bintulu, kitai lebih ngemeratka peranak ba endur tu (Tatau) sereta baka nya mega ba endur bukai,” ku iya.