Dikarang Judan Bungap
BESAI UNGKUS: Bolly (rintai mua, empat kiba) begambar kenang begulai enggau raban gerija maya ke nemuai ngagai taba Palan Parish nya.
SIBU: Bishop Gerija Anglika Menua Asia Tenggara ti mega Bishop Anglika Sarawak enggau Brunei Darussalam The Most Reverend Archbishop Datuk Bolly Lapok udah nemuai ngagai taba endur ngentak Palan Parish Anglika di Kampung Sentosa, Salim ditu, empai lama ke udah.
Penemuai iya disempulang Vicar Gerija Anglikan Saint John Reverend Canon Jamal Senada enggau Sapit Chairman Kaunsil Parish Gerija (PCC) Sibu Umpie Awi.
Nitih penerang ari Chairman Men Fellowship ti mega orang ke megai tanggungpengawa pemansang projek nya Ujang Anyi, projek nya sebengkah projek ti ngena timpuh lama ke diadang tembu 10 ngagai 20 taun ti deka datai.
Kebuah pia ku iya, laban ungkus dikena ngaga projek nya empai ditemu lalu deka berengkah dientak bepelasarka asil ari program ke deka diatur belabuh ari diatu.
“Projek tu bekenaka ungkus ti besai. Nya alai kitai bepanggai bendar ba asil ke diulih ari program ke diatur,” ku Ujang madah ngagai pengarang berita.
Nambahka nya ku iya, projek ti bekenaka pemesai tanah seikar nya enti udah tembu ila ulih endur ngatur macham bengkah program baka lumba enggau main, seminar enggau program bukai.
Ujang madah, tuju projek nya digaga ngambika tau nyadi sebengkah aset Gerija Anglika Saint John Sibu seraya ngemuntangka pengawa bala raban gerija ngatur program nyengkaum sembiang missa.
“Penembu projek tu ila mega ulih nyeliahka kitai ari ke nyuwa palan bukai maya ngatur program lebih agi program ke besai,” ku iya sambil madah penembu projek nya mega nyadika kelai pemansang mengeri Sibu.
Palan nya nyadi palan ke tiga ungkup gerija Anglika Saint John ke sebedau tu bisi dua bengkah palan iya nya Sibu Jaya Extension Centre (SJEC) enggau Destiny Anglican Centre (DAC), Jalai Pahlawan.
Palan ke empai tembu tu iya nya ba Lot 1707, Block 9, Seduan Land District tauka di Kampung Sentosa, Salim Fasa III.