KUCHING: Pengawa ti nadai meri penguntung baka vandalisme enggau salahguna dadah sereta ngirup ai bisa patut diseliahka tiap iku nembiak Politeknik Kuching Sarawak (PKS) ngambika muntang agi nyapai penyulut ba pelajar.
Direktor PKS Ong Guat Leng madah, pengawa tauka ulah ti baka nya ulih ngeruga pelajar lalu ngujungka enda nyulut sereta ngeluluhka ati apai indai ti meri pengarap besai ngagai anak.
Ku iya, apai indai bebendar ngenukuka anak ulih belajar pengelama tiga taun di PKS lalu nerima diploma.
“Anang malut diri ngena pengawa tauka ulah ti enda manah laban nya ulih ngeruga pelajar sereta ngujungka enda pas ba bidang ke diambi,” ku iya.
Iya mansutka pekara nya lebuh bejaku maya bejadika Minggu Suai Kenal Sesi Jun 2014 ditu, kemari.
Bisi 1,160 iku nembiak baru masuk PKS ti nyereta Program Minggu Suai Kenal ti berengkah 16 ngagai 20 Jun tu.
Bejaku baru Ong madah, tiap iku nembiak PKS enda tau enda datai ngulu licha enggau amali ngambika enda betapi enggau penanggul ngulihka pemutus ti nyulut ba ujung semester.
“Aku ngarapka nembiak ukai semina nganti nyau deka beperesa baru deka bebendar tauka minta deka ngambi peresa nya baru ketegal ngulu licha kurang 80 peratus,” ku iya.
Kelimpah ari nya,Direktor Bahagian Pengambilan Pelajar Jabatan Pengajian Politeknik Dr. Zamzam Mohd Walid madah, sepenyampau 170,000 peminta diterima deka masuk ngagai politeknik serata menua.
Ari penyampau nya ku iya, semina 22,000 dipilih ba sekali ngambi masuk.
“Tiap iku nembiak ke diterima nampung pelajar ba politeknik patut berasai temegah ati laban sida orang ti betuah.
“Kebuah pia laban tetiap kali pengawa milih masuk politeknik penyampau peminta endang mayuh,” ku iya.