KUCHING: Urung 120 iku deliget ari menua Kanada, Eropah, Jepun, Amerika Selatan, Turki, England enggau Amerika datai ngulu ‘19th International Conference on Transformative Science and Engineering and Social Innovation’ (ICTSESI) ke diatur di sebuah hotel ditu, kemari.
Dipenyadika Menteri Pekara Wang II ke mega Menteri Opis Kunsil Kandang Menua Dato Seri Wong Soon Koh ti ngarika Kepala Menteri Tan Sri Datuk Amar Adenan Satem, aum diatur lima hari berunggu, berengkah 15 nyentuk 19 Jun 2014.
Berambaika leka jaku ‘Smart Innovative Societies’, aum diatur ‘Society of Design and Process Science’ (SDPS) nengah kerejasama Swinburne University of Technology (Sarawak).
Aum ngundang sekeda speaker ke landik ba pekara akedemik sereta industri ari mayuh bengkah menua nyengkaum Jepun, Malaysia, Norway, Belanda enggau Amerika.
Keretas kereja tauka teknikal bejuraika pekara ti bekaul enggau sains sereta teknologi nyengkaum kuasa ke ulih dikena baru, ‘software engineering’, pemansang dagang ICT, pekara pengintu pengerai ke engkeman enggau atur pemansang ke meruan.
SDPS ditumbuh di Austin, Texas ba taun 1995 lalu nyadi sebengkah gerempung ti enda ngulihka penguntung ke nyendiaka chara berunding ti dulu ba mayuh bengkah pekara sains enggau teknologi ba renggat profesyenal.
Ba aum nya mega, Swinburne Sarawak enggau SAINS nyain dua sempekat pemereti ati (MoU).
Kededua MoU iya nya ‘High Performance Network Video Recorder and Video Management System’ enggau ‘Framework for Effective and Sustainable Rural ICT Adoption in Sarawak Through Leveraging Community Informatics and in-situ Human Capital Development’.