SIBU: Pengawa ngemanah Penyangkai Ekspres Sibu ti bekenaka ungkus urung RM300,000 deka belabuh enda lama agi.
Pemesai Opis Kaunsil Sungai Sarawak (LSS) William Jinep madah, konteriktor sebedau tu enda tetembuka projek nya ngujungka sida muka awak ngagai konteriktor bukai.
“Tinda tu udah diberi ngagai konteriktor nya bulan April tu tadi lalu sida diberi awak dua bulan nembuka projek nya.
“Enti nunda projek nya tembu sebedau Hari Gawai tu tadi,” ku iya madah ngagai pengarang berita.
Jinep ngarapka projek nya ulih belabuh baru bulan dudi tu.
Maya ditanya bagi pengawa ke deka digaga, iya madah, projek nya nyengkaum ngemanahka perambung penyangkai nya.
Iya mega madah, tail ke udah rusak mega deka diganti baru.
Ba pekara bukai, Jinep madahka opis sida udah bisi komiti pengelikun sungai dikena neritka atur pengelikun perengka pengangkut ai.
“Kami benung bekerejasama enggau polis, Opis Tasik enggau Agensi Penerit Adat Maritim Malaysia (APMM).
“LSS nyadi ketuai neritka adat lalu perengka pengangkut dipegai Opis Tasik. APMM bejalaika sekeda kimpin pengelikun,” ku iya.