SIBU: Serakup Veteran Soldadu Nengeri Sarawak (PVTMS) benung ngiga lima iku ex-soldadu ngambika nerima bantu ‘one off’ sepenyampau RM500 seiku ke diungkup ngagai sida ti nyelai pendiau (OKU).
Sida tu iya nya Kpl Jambi Suyong ari Rumah Unggi Klauh Tinting, Kenawang, Sri Aman, Kpl Jahon Jais ke diau ba Blok H, Tingkat Bawah, Pintu 3, Taman Suria Jaya, Matang.
LKpl Guwel Tahel ke diau ba Pangan Pasau, Tebedu Mawang, Serian, Pbt Hamzah Acheh di No.147, Kampung Pengkalan Kuap, Jalai Dato Musa, Kota Samarahan enggau Rjr Awang Amit Awang Sebi di No.99J, Taman Yen-Yen, Jalai Matang.
Presiden PVTMS Thomas Ling madah, sida lima tu enda ulih digiga serakup sida laban deka nesau senentang Pengerami Nyuaka Bantu ‘One Off’ Tabung Bujang Berani ba Hotel Grand Continental, Kuching kena 14 Jun tu.
Pengerami nya deka berengkah ari pukul 9 pagi lalu deka dipenyadi Sapit Chairman Besai Kimpin Turu Bujang Berani 2013 ti mega Presiden Gerempung Ex-Soldadu Malaysia (PBTM) Laksamana (B) Tan Sri Dato Setia Mohd Anwar Mohd Nor.
“Kitai ngarapka sida lima tu ulih lengkas betemu madahka pendiau diri ngagai kitai,” pia ku iya maya aum media, ensana.
Ba pekara bukai, PVTMS udah mujur mantu ngerijister 45 iku veteran ATM OKU ari serata nengeri Sarawak nerima bantu nya.
Ari penyampau nya, 29 iku lebih agi sida ke ari Kuching deka nerima bantu nya kena 14 Jun tu.
“Iya ke bukai deka nerima ba sebengkah pengerami ke deka diatur di Sibu enggau Miri,” ku Ling sambil madah sida nya sida ke enda ulih ngenatai ke diri ngagai Kuching.
Bantu ‘one off’ nya asil ari Kimpin Turu Bujang Berani 2013 ti mega seiti ari kelai rayat menua tu mengkang ngenang bala bujang beriani ti kala berambun nyawa ngetanka pengelikun menua tu.
Taja pan penyampau bantu nya enda bangat mayuh tang ku Ling, bantu nya ulih ngelempungka agi tating pengidup bala veteran Atm.
“Nya alai, kitai andal bendar venteran soldadu OKU ba nengeri Sarawak anang laun ngerijister diri nengah chara ngiga PVTMS ngambika bela ngasaika bantu nya,” pia ku Ling madahka baru.