LAWAS: Ketegal kelalu sarat ngundan kayu batang sebuah lori enda mukai-mukai lungkup ngerimbai simpang Wisma Persekutuan Lawas ditu ensana.
Penusah nyadi urung pukul 10 pagi nya, dijangkaka laban kelalu mayuh ngundan kayu sebedau ke lungkup ba tisi jalai.
Penusah nya ngujungka sebuah kerita bechura mirah ke dipaking enda jauh ari palan nya balat rusak kena tinggang kayu batang.
Taja pia, nadai orang diripotka bebadi nyawa.
Berebak enggau nya, Kepala Pampang Opis Pengangkut Jalai (JPJ) Lawas, Julaihi Dison lebuh dirandau meri jaku tangkan ngagai kereban pengangkut ke ngundan barang ngambika enda ngundan barang lebih ari patut laban sida deka kena tinggang ukum berat.
“Kami udah suah ngelalau kereban pengangkut ke ngudan barang awakka enda ngundan barang ngelui ari patut laban utai ke bansa nya ulih ngeruga pengelikun enggau ulih medis orang bukai.
“Kami deka madah ngagai sida undang-undang ke diletak ngagai sida chukup besai,” ku iya.
Iya madah, raban sida deka naka ulih nguna penakar dikena nimbang barang ke diundang sida udah tu.
Berebak enggau nya, ku iya perengka penimbang nya diatu udah kala dikena ba pelilih menua Limbang.
Kelimpah ari nya, operasyen enggau matau deka terus dipejalaika empat iku staf sida ba Lawas.
Udah nya, bela ngesah palan endur penusah iya nya raban Bomba enggau Penyelamat Pelilih Menua Lawas.