Ketuai raban bansa mega patut nusoi penerang ke betul ngagai peranak ti dipegai sida
MUKAH: Tuai Rumah enggau Tuai Raban Bansa ngembuan tanggung pengawa nyaga pemanah kaul entara rayat enggau perintah.
Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah, tuai rumah enggau tuai raban bansa mega patut nusika penerang ke betul ngagai rayat.
Nyema tuai rumah enggau tuai raban bansa enda bejalaika tanggungjawap sida enggau meruan, nyadi sebarang aktiviti tauka program ke disediaka perintah deka tejanggal.
Nya alai, nengah tuai rumah enggau tuai raban bansa penerang ari perintah deka datai ba pending rayat,” ku iya rambau Pengawa Nyuaka Surat Dichiri Nyadi Pengulu ungkup raban bansa China enggau Pengawa Nyuaka Bantu Tim Penyayau Parti Pesaka Bumiputera Bersatu (PBB) Dalat ba Taman Ceria, Dalat ensana.
Ba pengerami nya, Pengulu Sim Tan Chuan dipadu nyadi pengulu baru nyaga kandang Taman Ceria enggau Pasar Dalat.
Kelimpah ari nya, bisi 75 iku rayat ba kandang menua nya nerima bantu ari Tim Penyayau beserimbai enggau pengawa nya.
Fatimah ti mega nyadi Kaban Kunsil Nengeri (ADUN) Dalat madah, Tim Penyayau endang sebengkah komiti Indu PBB dikena ngempit rayat enggau bekerejasama enggau tuai rumah sereta tuai raban bansa ba mayuh bengkah endur.
Iya madah, penumbuh tim penyayau nya endang dikena nentuka perintah seruran semak enggau rayat, kelimpah mandangka pengasih ngagai mensia mayuh.
Udah nya dikena nentuka pengelantang sida terus dijaga enggau meruan.
Iya madah, aktiviti enggau program begulai enggau rayat deka dipejalaika Tim Penyayau sepemanjai taun baka pengawa ngabas kampung enggau rumah panjai.
Tim nya ditumbuh ukai semina ba peringkat pampang aja tang mega ba geap ranting. Nengah pengawa ke bansa, kitai ulih nemu penusah ke nuntung rayat.
Nyema bisi rayat ke begunaka bantu, nyadi kami deka nguji nulung dikena ngelempungka penusah ke nating sida,” ku iya.
Berebak enggau nya, Fatimah madah, taja pan Tim Penyayau endang komiti ungkup Indu PBB tang komiti Apai enggau Nembiak PBB mega dibai bejalai ngemansangka komiti nya.
Ukai reti komiti Apai enggau Nembiak PBB enda ulih enggau, tang sida ke dibai sama nyaup komiti Indu PBB,” ku iya.
Sama bisi datai Pemesai Pelilih Menua Dalat Kueh Lei Poh, Temenggung Hendi Suhai, Pemancha Albert Kiroh sereta bala bukai.