Dikarang Judan Bungap
KANOWIT: Sida ke ngempu Tanah Adat Bansa Asal (NCR) ditangkan ngambika enda sengapa nyual tanah ngagai orang bukai.
Kaban Kunsil Nengeri (ADUN) Ngemah Alexander Vincent madah, tanah NCR diatu berega lalu patut ditan ngambika pulai ke penguntung diri.
“Enti nunda tanah tu patut diberi ngagai anak uchu kitai laban tanah tau nyadi puku ngulihka pengidup ti meruan agi dudi hari ila.
“Diatu perintah benung bebendar ngemansangka tanah NCR enggau pengawa betanam ti ulih mulaika penguntung ngagai rayat empu,” ku iya.
Alexander mantaika jaku nya maya bejadika Program Penghayatan 1Malaysia Sepakat Bestari Komuniti 1Malaysia (K1M) pelilih Kanowit seraya ngintu Hari Gawai N.43 Ngemah ba Dewan Penghulu Ugap Seribu, Nanga Tada ditu, empai lama ke udah.
Program nya diatur begulai Opis Pemadah Malaysia, K1M enggau Komiti Pengelikun Genturung Pendiau (JKKK) Nanga Tada.
Pengerami nya bela digulu bini Alexander Susan Clement, Sekretari Politik Kepala Menteri Maurice Giri, Pemesai Opis Pemadah Kanowit Wan Mohd Zuki Wan Ismail, Pemesai Opis Pekara Khas (JASA) DUN Ngemah Jelani Ajang, Chairman JKKK Nanga Tada Penghulu Ugap Seribu, Chairman K1M Nanga Tada Kaunsilor Bunut Kubu enggau Tuai Gawai Tuai Rumah Mathew Sembilan.
Berebak enggau tu mega, Alexander ngelalau rayat ngambika enda sanggu nerima projek nyukat kelinggi ke diatur Opis Tanah enggau Survei laban tuju projek nya ukai dikena ngambi tanah rayat.
“Perintah diatu benung chakah berunding jalai ti engkeman ngambika isu ke bekaul enggau tanah NCR ulih diputar enggau manah,” pia ku iya madahka baru.
Ngenang pemansang ba DUN Ngemah, iya ngarapka rayat dia besabar nganti pemansang nyengkaum sida ke empai ditampung karan laban pekara nya nyangka deka teputar ujung taun tu.
Maya tu mega, Alexander muji pengerami ke diatur sehari nya laban ku iya pengerami baka tu tau nyadika platform numbuhka penyerakup enda ngira bansa.
“Kitai ngarapka pengerami baka tu ukai semina diatur nyerumba gawai aja tang tau diatur maya pengerami bukai baka Hari Raya enggau Taun Baru Cina,” ku iya madah.
Nambahka nya, iya ngarapka rayat semampai nyukung pengeransing perintah Barisan Nasional ti numbuhka pemansang enda milih pulaika penguntung ngagai sapa baikka penyakal.
Ba ujung jaku iya, Alexander bisi ngerahka bantu RM10,000 diberi ngagai JKKK Nanga Tada dikena bejalaika program sida.