Dikarang Rengenyan Labang
SERIAN: Rayat dipinta enda mudah dikeruga penemu penyakal ti bepetenahka perintah ngambi tanah rayat nengah pengawa nyukat tanah Adat Bansa Asal (NCR) di baruh inisiatif baru Seksyen 18 Kanun Tanah Negeri, laban tuduh nya enda betul.
Menteri Pemansang Infrastruktur enggau Penyambung, Dato Sri Michael Manyin madah, penyakal ngena isu tanah nya maya pengawa bepilih dikena ngeruga runding sereta narit sukung rayat.
“Aku berasai enda lantang ati laban maya pengawa bepilih nengeri (PRN) suba sida Parti Keadilan Rakyat (PKR) madah ngagai mensia mayuh ngena ‘flyers’ iya nya, urung tiga suku tanah di pelilih mit Serian ditu diempu aku.
“Baka nya mega sida (PKR) madah, tiga kandang menua ti disua kitai surat warta rizab seharitu (kemari) dipadahka diempu Roland Sagah (Kaban Kunsil Nengeri (ADUN) Tarat).
“Enti tanah nya amat diempu aku enggau Sagah, ke patut iya kami dua ti nerima surat pala tanah tu. Tang baka ke ditemu kitai ari atur pengerami seharitu, tu endang ngayanka penyakal maya PRN ngena mayuh macham tuduh sereta bisi ti enda masuk akal,” ku iya seraya minta rayat enda mudah dikeruga raban penyakal.
Manyin ti mega ADUN Tebedu mansutka pekara nya lebuh bejaku ba pengerami nyuaka Warta Rizab Gunasama (Pertanian) Bumiputera, Bahagian Samarahan, ti diatur Opis Tanah enggau Survei ba Bilik Santapan, Dewan Masyarakat Serian ditu, kemari.
Ba pengerami nya Manyin nyuaka warta rizab ngagai tiga kandang menua ti mungkur raban bansa Bidayuh, Iban enggau Melayu ti nyengkaum 13 buah genturung pendiau (GP) tauka Kampung (Kpg) baka GP Tarat Melawi, Serian; GP Tarat Sibala, Serian; GP Tarat Mawang, Serian; GP Munggu Lalang, Serian; GP Bunga, Serian.
GP Baru Mawang, Serian; GP Taee, Serian; GP Lanchang Sabai, Serian; GP Lanchang Sijo, Serian; GP Segenam, Serian; GP Sg. Turong, Serian; Kampung Muara Tuang, Samarahan enggau Kampung Tanjung Bondong, Samarahan.
Ku iya perintah deka majak bejalaika pengawa nyukat tanah NCR nya ke penguntung enggau pemanah pengempu tanah nya, lebih agi ungkup rebak dudi.
Komitmen perintah nyukat tanah tu dikena ngenukuka tanah nya bisi surat pala sereta endang sah diempu pengempu tanah nya, ku iya.
Bejaku baru iya madahka, pemanah tanah disukat sereta dikeluarka surat pala tanah nya meri peluang ngagai anak uchu ke nampung jemah ila ulih bejalaika pengawa dagang asil ari nginjau duit pengudah geran nya digadai.
“Nya alai pengawa nyukat tanah tu ukai tuju perintah deka ngambi tanah rayat, tang perintah deka meri surat pala tanah ngagai pengempu tanah nya.
“Anang saru penemu tauka runding pasal pekara tu. Terus beri sukung ngagai perintah Barisan Nasional (BN) ti deka sereta ulih nyaga hak kitai,” ku iya.
Bisi datai ba pengerami nya kemari Roland Sagah, ADUN Muara Tuang Dato Sri Mohamad Ali Mahmud, Penguasa Tanah dan Survei Pelilih Samarahan Rozlan Putit enggau ke bukai.