KUCHING: Serakup Bansa Dayak Bidayuh (DBNA) benung chakah ngelakuka tiga ari empat buah bup sereba reti Jaku Bidayuh ti udah dikeluar ngena jaku Bidayuh Bau, Biatah enggau Serian.
Dikalih ngagai Jaku English enggau Bahasa Malaysia, bup sereba reti tu tau dibeli nengah rega RM25 enggau RM35 ungkup ke dichelak ‘hardcover’.
Nitih penerang ari koordinator Josak Siam, bup udah dilanchar kenyau 6 Julai 2013 lalu naka ke diatu lebih 3,000 bup udah dijual ngagai mensia mayuh kelebih agi bansa Bidayuh.
Ku iya, tuju bup dikeluar iya nya ngambika tau dikena ngemuntangka 4 macham jaku asal Bidayuh, baka ke Bidayuh Bau, Bukar Sadong, Biatah sereta Salako.
Asil ari pengawa bejual bup nya deka diberi ngagai Program Pemansang Bahasa Bidayuh kelebih agi ungkup pengawa ngadu pelajar dulu nembiak mit nengah Pra-Sekula Bahasa Pesaka.
Naka ke diatu bisi lapan genturung pendiau udah nyendia pra-sekula ti bekenaka bahasa Bidayuh iya nya di Gahat Mawang Tebedu, Sinjok Siburan, Benuk Penrissen, Bogag, Serasot, Apar Bau sereta Pasir Hilir enggau Kendaie di Lundu.
Berindik enggau nya, kami ngansak peranak Bidayuh meli bup sereba reti jaku Bidayuh tu, enda kurang seiti ungkup sebuah ruang bilik,’ku iya.
Pengawa kitai ke meli bup tu deka nyaup pengeran DBNA ngintu sereta ngangkatka bahasa Bidayuh,’ku iya lebuh dikerandau di DBNA ditu, kemari.
Kelimpah bup sereba reti, DBNA mega ngeluar bup sereba reti begambar dalam empat jaku iya nya Salako, Bukar Sadong, Biatah enggau Bau.
Bup sereba reti begambar tau dibeli nengah rega RM5.00 seiti sereta bisi dijual di indu opis DBNA ditu.