MIRI: Seiku lelaki parai pengudah kerita ke ditepan iya dituntung penusah bebadi ba sebengkah penusah eksiden ba Jalai Ilmu iya nya jalai pansut ari Desa Senadin nuju Kuala Baram Bypass ditu pagi ensana.
Mansa benama Reuben Lim Chiaw Phon, 33, parai ba palan penusah nyadi laban balat bakal ba pala enggau dada.
Nitihka penerang, maya penusah nyadi urung pukul 8.20 pagi, mansa ke agi bujang asal ari menua Sibu lalu diau ba genturung pendiau ke semak nya lalu deriba kediri-diri laban deka nurun ngagai pasar.
Taja baka nya, lebuh datai ba palan penusah nya, kerita Proton Saga BLM bechura chelum ke ditepan mansa tepawah sebedau ensayar ngagai tisi jalai lalu ngelantak pun kayu.
Berindik ari penusah nya, mansa kena kepit ba penuduk alai deriba.
Udah nya, seraban polis, staf perubat enggau kaban Bomba Miri berumban ngesah palan penusah nyadi pengudah ningga berita nya.
Raban bomba tepasa nguna awal setengah jam endur ngemansutka bangkai mansa ari kerita ke ditepan iya.
Kepala Polis Pelilih Miri, ACP Gan Tian Kee lebuh dirandau ngaku sida amat bisi nerima ripot bekaul enggau penusah eksiden nya.
Iya madah, polis enda ngenggaika nyangka kebuah penusah nyadi laban jalai lichin pengudah ujan memesi ke nyadi ba endur nya tumu pagi ensana.
Taja baka nya, ku ita raban polis trafik deka bejalaika pansik ke silik beratika nama kebuah penusah nya tau nyadi.
Berebak enggau nya, nitihka penerang menyadi indu sulu mansa ke enggai nama iya disebut, madahka mansa diau nyewa begulai enggau sulu iya ba sebuah rumah ke enda jauh ari palan penusah nyadi.
“Laban iya asal ari menua Sibu sereta nadai kaban belayan ditu, iya suah datai ngelawa rumah kami makai enggau kami sebilik lalu kepenudi iya betemua enggau kami malam ensana,” ku iya.
Nitihka penerang indu nya, sida sebilik nemu berita nya urung pukul 8.30 pagi pengudah ditusika menyadi iya ti mega nyadi sulu lelaki nya.
Nangkan nya, nitihka penerang sekeda pekereja ke gawa kontrak enda jauh ari nya, sida bisi tepedaka kerita mansa bepusin 360 darjah sebedau telantakka pun kayu ba palan penusah nyadi.
Lebuh tepedaka penusah nya, sida berumban ngelawa palan penusah deka meri bantu tang enda ulih ngaga nama-nama laban mansa kena kepit ba palan penuduk deriba.
Mensia mayuh ke bisi datai ba palan penusah nyadi berumban betelefon ngagai polis minta bantu.